上期估計錯誤，些路廸歐聯前突排出強陣，令推介蘇超「紅盤王」鴨巴甸「+1」損手；希望呢期有德甲「紅盤王」史浩克04出馬，可以周日主場大炒利華古遜本利歸還。
史浩克上場尾段畀禾夫斯堡迫和，搞到佢哋聯賽6連勝告終。好彩史浩克個個前鋒都「弗」到漏油，古蘭爾國際賽入完波，返聯賽再入；盧雲克蘭斯又交足功課，對住有後衞祖安養緊傷嘅客軍防線，入波話咁易。
利華古遜喺周中歐協盃飛咗去英格蘭大戰布力般流浪爭出線，休息唔夠兩日又要硬撼史浩克，唔變軟腳蟹先奇。
睇番近季兩隊交手入波入到癲，上季史浩克就喺主場炒過對手7:4，之前又開過3:3及2:3之類波膽，真係隨時玩埋「總入球」嘅「5」、「6」及「7+」都仲得。
唔好意思，有電話入......「喂！......真係咁抵？」啱啱收到隔離專研究黑盤嘅牽牛兄電話，佢話利華古遜輸盤率達64%，排緊德甲尾3。嘩！當堂信心大增，再睇海外莊家開到史浩克W得1.57倍，重插啦喂老友！文：畢傑