玩過無雙系列嘅機迷,都會知道此作賣點係大堆頭,人氣足,不過要響畫面內塞滿咁多人,對主機要求自然唔低,所以當聽到NDS上竟然會推出《真‧三國無雙DS》,實在懷疑會唔會再出現《WENDS》嘅爆格畫面!初步睇畫面,主要以3D組成,而官方亦指要保留無雙精髓,即係要打得爽快,所以戰場上最多可預備20名敵軍供機迷斬殺。玩落流暢度就要等推出先知,不過從發布嘅畫面,畫面就真係幾一般,屬於超任時代級數,始終NDS強項並非係3D,而玩家可能更着眼NDS所提供連線對戰功能,可以一對一,又或最多3人連線,贏出更可獲得敗方卡牌。
加入武將卡牌
NDS版無雙角色都會用晒Q版造型,睇住卡通嘅關羽張飛打打殺殺,都幾過癮,而角色會透過新加卡牌系統控制,開戰前要挑選自己心水卡牌組合,不同武將擁有不同能力同特殊技能,基本有提升我方能力、阻礙敵方前進、防禦力提升等,總數將會有100種之多,戰勝就有機會取得卡牌,仲可以升級㖭!另一個新玩法係妨礙系統,可以利用金錢轉動輪盤選擇技能,當中包括威力驚人嘅地震、暗雲、寒冰等絕技,要應付大堆頭敵人時,亦唔會只係狂㩒咁單調!《真‧三國無雙DS》預定三月尾就會推出,睇來又會繼《三國大戰DS》後,再掀起三國熱潮。
記者:許福合
網址: http://www.gamecity.ne.jp/ds/smusou/