爆竹一聲除舊歲，祝大家豬年行大運，炒股炒輪都豬籠入水，賺個滿堂紅。
通勝話今日開市好日，裏面寫住今日有乜嘢「月德、月恩、天喜、天醫」嘅貴神，總之就不得了，如果今日開番個靚嘅紅盤，等大家發番啲新年財就真係皆大歡喜嘞。
每年農曆年假之後，都會引起一啲生肖嘅討論，就係幾時轉咗新一年，好似今年咁，初一係咪豬年嘅開始，睇吓報紙，應該例牌會有啲命理風水大師話畀市民知「唔係」因為轉流年喺睇立春而唔係睇春節，2月4日立春嗰日，已經係豬年。不過，由立春到𠵱家個市雖然反覆，但係都仲係好好。
過年之前個市都幾好，但係人行就同大家開咗個玩笑，港股「收爐」即刻宣布抽緊銀根，加存款準備金，今日港股會點反應，都好難講，股民喺「新春盤」都有一個共同嘅願望，就係紅盤炒上去賺錢，攞個利利是是嘅好意頭，一般開市時走勢唔係好差，都會傾向唔沽貨，或者買番啲，所以，抽緊銀根嘅消息唔一定喺今日反映出嚟，不過，期指好快就結算，大家發新年財嘅時候，都係要有兩手準備。
網通C輪4568：網通（906）上禮拜五報收20.50元，走勢好靚，補番月頭個下跌裂口，升破21元就可以大幅推高，向26元嗰頭走，向上嘅升幅確係幾吸引。
網通C輪4568上日報收45仙，槓桿率4.6倍（有效4.2倍），仲有69日先到期，溢價1.4%，對沖值0.91，正股升上26元，4568會見96仙樓上嘅價，就算正股升至24元，隻輪都有7成以上升幅，呢個價買啲，正股跌穿19.20元止蝕。