農曆新年幾日假期話咁快就過咗，打工仔又要收拾心情返工搏殺，第一件最想嘅梗係收開工利是，希望全年利利是是嘛。
中原地產後勤噚日正式開工，集團主席施永青親領董事總經理黃偉雄同執董何紹章一齊派開工利是，為同事打氣。今年嘅開工利是係50大元，同舊年一樣；中記香港嘅前線同後勤夾埋有3200人，咁計開工利是都要成16萬。
講開利是，中記早前為鼓勵前線而設嘅開單利是，每宗八嚿水獎金，預計初一至初三可以做到200單成交，但暫時埋單計數只係得近20宗，同目標似乎差好遠。
另外，美聯集團主席黃建業噚日都喺總部向後勤派開工利是（20蚊，同舊年一樣），仲順手派埋私人利是（紅底一張），後勤梗係齊聲歡呼叫好啦。美記前線同後勤總共約有3000人。
[email protected]