謝天華喺無綫賀歲劇《迎妻接福》中飾演「爛賭義」賀義，角色性格未致姦淫虜掠、無惡不作，但衰爛賭，幾乎搞到傾家蕩產，稱得上係古裝版「賤Man」，至於私底下嘅謝天華，同樣有「賤Man」風範，有時幾可愛，不過有時都曳曳。
甜言冧阿姐
前幾晚，馮仁昭就喺跑馬地一間7仔撞見謝天華買煙，咁本來唔出奇，問題係香港政府已經由今年1月1日起實施室內禁煙條例，謝天華竟然拎住支點着咗嘅煙行入7仔買煙，睇嚟佢煙癮好大吓，好彩佢因為全程顧住同店員阿姐傾偈，冧得阿姐鬼咁開心，所以把口就唔得閒吸煙。
買完煙，謝天華一踏出門口，即火速吸番啖，之後再會合一位男性友人上咗幢大廈。政府話明唔畀喺公眾室內場合吸煙，就連喺室內拎住支點着嘅煙都屬犯法，謝天華咁做分分鐘被罰千五蚊㗎！
雖然有時曳曳，但謝天華其實好錫老婆，早排馮仁昭又撞見佢同老婆Tina喺跑馬地買糖水，之後齊齊返屋企，好鬼甜蜜。只見Tina着住件厚身褸，個樣圓潤咗好多，後來問天華係咪快做老竇？佢只係咦咦哦哦，又話唔係又話唔答，最後答案係：「有消息自然會公布啦。」唔知謝天華係咪怕小器呢？
