好嘅設計，可以令一間幾百呎嘅屋仔變得闊落；相反，衰嘅設計唔單止浪費空間，仲嘥錢兼影響住戶健康。網友dbp喺《香港討論區》叫大家投票，選出最不滿意嘅單位設計，好似望正隔籬屋、鑽石廳、走廊太長、冇對流窗、要將窗台當床瞓、同埋廁所冇窗等，幾日已經有300票，當中大部份最唔滿意都係廁所冇窗嘅俗稱「黑廁」設計！
黑廁死症冇得救
looklook334：「廁所沒有窗，要用抽氣系統實在太煩人，保養維修及耗電量大；把窗台當作睡床一部份，亦是風水大忌；室內長走廊，浪費空間，導致可用面積低。」
victoriaahpak就認為窗台當床係最大問題：「打風落雨，如果膠邊漏水，真係瞓都無得瞓；如果反瞓嘅人，一腳伸落個窗，真係好大鑊；貼近床邊，望住樓下，只係隔塊玻璃，真係好大心理壓力。」佢仲好抵死咁講：「就算親熱，一開燈，窗簾反映各位男士嘅床上英姿……失禮人，甚或可能幫你計時……」
諒虜之父就發揮小宇宙，幫手解決設計缺陷，「鑽石形設計，只要花啲心思，可以有發揮；長走廊天花可以儲物，或者做特色燈飾，有得玩。」
redknapp11都話鑽石廳唔算係啲咩，「相對於黑廁同瞓窗台呢啲對健康有嚴重影響嘅設計，望住對面屋又嚴重侵犯私隱，鑽石廳相對冇咁嚴重，同埋可用設計解決，反而黑廁同瞓窗台呢啲係死症。」
其實以上嘅設計問題，多數都出現喺新樓，𠵱家發展商為咗物盡其用，好多時唔理實際需要，而要買家自己就位。如果大家唔想遇到呢啲煩惱，最好唔好買樓花，等到現樓實地考察過先決定；二手樓嘅話，就梗係睇多幾間至穩陣。