備受無綫力捧的馬國明和鍾嘉欣，希望藉不同角色磨練演技。鍾嘉欣在新劇《珠光寶氣》中演壞女孩奉旨玩男人，馬國明希望能演人見人憎角色，一於齊齊在豬年靠奸出位。
去年無綫《萬千星輝頒獎禮》中「飛躍進步男、女藝員」獎得主馬國明和鍾嘉欣，日前齊齊拍攝新年照，馬國明一見鍾嘉欣，即大讚對方說：「嘩！乜你原來咁高㗎！遲吓有機會都想同你合作。」難道他不怕緋聞女友曾華倩呷醋？
做好人嫌悶
馬國明和鍾嘉欣為無綫今年力捧小生花旦，為免得獎後進步變退步，兩人希望有機會自我增值，磨練演技，馬國明說：「我想做舞台劇，因為你做得好唔好，觀眾嘅反應會反映出嚟，同埋做舞台劇滿足感會好大。另外，我一直好想試吓做奸角，雖然好人比較易做，觀眾會好受落，但係冇乜發揮機會。我一向鍾意做戲，做得好人多會有少少悶，但奸角就會好出、好爆，有得發揮。」
狂𢱑銀贖樓
鍾嘉欣表示認同馬國明的話，她說：「奸角係有好大發揮機會，我好好彩，𠵱家拍緊嗰部長劇《珠光寶氣》，我演有錢女角色，因為太有錢，經常視男人如無物，將佢哋玩弄喺股掌之間，係一個壞女孩，對我嚟講真係好大挑戰，加上今次有機會同蔡少芬、林保怡呢班好戲之人合作，可以學到唔少嘢。」問到豬年願望，鍾嘉欣說：「希望可以接多啲騷，賺多啲錢，等我今年可以供甩層樓。」
採訪：戴彩煥
攝影：陳偉權
場地：奧海城
服裝：裕華國貨
化妝：JamieLee＠beautypro（馬國明）
