下個月車路士就會喺佢哋嘅官方網頁上，增設「韓文版」畀韓國球迷瀏覽，睇嚟車仔唔只淨係昅實個中國市場，而係睇重成個亞洲市場，呢招真係高呀！
唔知球迷有冇發覺，隔離曼聯、熱刺同米堡都有朴智星、李榮杓及李東國等南韓球員喺陣內，但偏偏人哋嘅官方網頁上就冇韓文提供；至於車仔連一個南韓兵都冇，今次擺明係想開拓更多亞洲市場掘金。
車仔最近先啱啱話上季虧蝕約12億港元，仲講明下季門票唔加價，費時冇人入場影響收益，今次突然增設「韓文版」，球迷都知佢哋想點。車仔行政總監簡安仲好假咁話：「我哋成日都有昅實啲南韓球員，更有興趣簽佢哋入隊。」唔好比我求大俠批中，車仔都係昅呢班南韓兵嘅市場價值啫，到頭來都係不離個「錢」字，呃我唔到嘅！
贊助商係南韓品牌
不過諗深一層，車仔波衫上面個贊助商係南韓極出名嘅品牌Samsung，今次網頁上加埋「韓文版」亦非全無道理嘅。估唔到係車仔有無限身家嘅班主阿巴莫域治照住，都會因為上季蝕錢，而要搞咁多少動作搵銀啫。