吸煙危害健康，唔少國家同地區嘅政府都加強力度禁煙，香煙股前景會點呢？
tecno242喺《Yahoo!》討論區留言話：「當經濟向下調整嘅時候，好似食品、石油同香煙呢類防禦股就買得過，可以作為投資者嘅避風塘嘛！」
投資者避風塘
咁又係，以香煙業巨擘Altria為例，佢除咗香煙生意之外，旗下嘅食品業務有唔少品牌都相當暢銷，股息率仲超過4厘，加上過去盈利表現強勁，對股民嚟講又真係幾吸引。再者，香煙毛利極高，又唔需要時刻玩花款、搞創新，全球都有市場，就算加價都唔會對生意有咩重大影響。《紐約時報》都指出，即使美國煙民平均每年減少1至2%，煙草商收入一樣有理想增長。
網友mmassey200承認買香煙股只係貪圖股息，但noname認為：「煙草商經常要面對與香煙有關嘅訴訟，容易成為投資者炒作藉口，股價有可能出現大幅波動喎！」不過，唔少網民一於好少理，反而好關注煙草商其他業務，對於Altria分拆旗下卡夫食品（Kraft），pebble_perfect就話：「我不嬲都覺得煙草商應該專注香煙業務，我會密切留意事態發展！」Altria已定於下月30日分拆卡夫食品，預期年內會就分拆旗下美國及海外煙草業務作出決定。
至於全球三大煙草商的股份表現，Altria過去一年回報23.45%，預測市盈率15倍；第二大煙草商英美煙草回報23.28%，預測市盈率16倍；日本煙草回報49.03%，市盈率41倍。