新界鄉議局主席劉皇發連續第四年，喺大年初二去車公廟為全港市民求籤，結果求得一支36號中籤，籤文為：「問君曾見舊時無，一醉昏迷誰為扶。正是今朝新樣出，無錢空手又是沽。」雖然只係中籤，但點都好過民政事務局局長何志平03年求到嗰支下籤，嗰次搞到沙士肆虐本港，都唔知好唔好賴佢。
解籤師傅話，36籤「吉中帶凶」，特別係股票金融方面，難免有阻滯同風波。《香港討論區》網友亦露一手一齊解吓呢支籤，elitewaterlily話：「簽文講到好清楚：就係舊願未還，求財未遂，即係想個市繼續升嗰啲上唔到，貪勝不知輸，贏多啲最終得個桔！」
我會炒好呢隻股
MT就持相反意見：「如果外資敢大手沽空，阿公攞啲QDII出嚟大手掃貨啦，一來人仔有出路，又可以幫A股下下火，又可以贏錢，對祖國有利！所以我話（股災）機會不大，都係上落市多！」
ricleung亦對籤文有以下解說：「股民，你們經歷過股災嗎？還記得當年政府出手入市嗎？現在正是新危機出現的時候，當所有股民入市就係股災之時。」gckl提醒散戶，有貨快沽，見好就收。belebala100大無畏，叫大家鎮定啲，股市升跌都各有方法賺錢，何必杞人憂天，他建議大家念咒語：「我會炒好呢隻股」，總會有幫助。
車公廟解籤王師傅認為，7及8月股市較差，勸諫股民勿去得太盡，與本報訪問的兩位證券界人士：訊匯證券董事總經理沈振盈，及高信投資顧問行政總裁首席環球投資策略員沈慶洪看法相若。
沈振盈建議散戶年中全面沽貨，撤走股場；沈慶洪則指，今年下半年的運程較上半年弱，宜於首季開始慢慢減貨，在第2季末第3季初時再入市。