鄭中基和蔡卓妍（阿Sa）這對小情侶，今年賀歲檔各自有電影上映，可惜鄭中基自導自演的《心想事成》卻心想事不成，上映了7日，票房也過不了500萬，而女友阿Sa主演的《雙子神偷》更大鑊，上映6日只收了324萬，兩片票房雙雙插水，真是苦命鴛鴦！
今個賀歲檔期，港產片雖有劉德華與古天樂主演的《門徒》、鄭中基自導自演的《心想事成》及Twins主演的《雙子神偷》對撼幾部西片，但除了《門》片力保不失，上映8日，截至前日收約1494萬，成績令人滿意外，其餘兩片票房都遭遇滑鐵盧，《心》片上映了7日，截至前日僅收得471萬，的確令人感到意外，至於《雙》片上映6日，只收了324萬，票房更令人失望。
《侏羅館》勁
6日票房近2,000萬
踏入豬年，鄭中基與女友阿Sa可謂流年不利，雖各自有賀歲片上映，但兩片均不幸成為炮灰。西片方面，以桑勒菲（ShawnLevy）導演、諧星賓史廸拿（BenStiller）主演的《翻生侏羅館》（NightAtTheMuseum）票房走勢最凌厲，上映6日，截至前日約收1994萬，前天的單日票房就收了接近300萬，相等於《雙》片6日的累積票房，暫時成為賀歲片王。
其餘兩部賀歲西片《森林反恐隊》（OpenSeason）與《莎樂的神奇網網》（Charlotte'sWeb）就成績麻麻，前者上映6日收238萬，後者上映4日同收238萬，比較起《翻》片的票房真有天淵之別。另外由麥羅倫斯（MarcLawrence）導演、曉格蘭特（HughGrant）與杜莉芭里摩亞（DrewBarrymore）主演的《冧歌有情人》（MusicAndLyrics）因口碑不俗，上映了7日優先場，累積票房已有265萬，成績算是不錯。
今年賀歲檔期，有六部中西片同時上映，恐龍暫成為賀歲片王，張同祖導演昨日分析說：「《翻生侏羅館》因為片種啱一家大細睇，一定係首選，而爾冬陞部《門徒》因為係有質素嘅電影，加上卡士配搭唔錯，有華仔、吳彥祖同古仔擔正，觀眾當然會有信心，所以呢部雖然唔係傳統嘅賀歲片，但觀眾一樣樂於捧場；至於鄭中基嘅《心想事成》票房唔得，我諗同之前佢有兩部戲口碑唔係咁好都有啲關係，其實𠵱家觀眾睇戲都係要睇影片本身質素，如果有水準，乜類型戲都有機會大收。」
《門徒》收得
爾冬陞感謝陳可辛
身在新西蘭度歲的爾冬陞對於《門》片收得，他開心地說：「繼上年嘅《霍元甲》，到今年嘅《門徒》，證明賀歲檔期唔一定要排喜劇上映，新一代觀眾已經唔介意喺呢個檔期睇非喜劇電影，其實今次《門徒》成功，我都要多謝陳可辛喺發行同宣傳策略方面做得好成功，我相信只要一部戲拍得有質素，始終會有觀眾支持，而《門徒》成績唔及《翻生侏羅館》，係意料中事，因呢部戲喺美國都好收得，又啱成家人睇，票房當然會較有利。」
採訪：葉雪
資料來源：MOV3.com，票房計算截至前日
