分析員一直都係令人趨之若鶩嘅職業，呢行身份高尚就夠高尚，個牌又難考，但有時唔知係咪公司太多睇唔晒，分析員有時都會搞錯嘢，讀者可以從兩間大行點分析網通賣網通寬帶50%股權領略一吓。
話說網通同8號仔有間合營公司叫網通寬帶，一人揸一半，響寧波同杭州搞寬頻，農曆年假前，網通將自己嗰份放售，於是乎，大家開始覺得事出突然、8號仔響祖國一定冇運行……
先係一間美資大行，話事件凸顯雙方關係惡化，未來合作或受負面影響。查實當年8號仔入股呢間合營公司50%股權時，張通告寫明其中一個先決條件係網通要將佢嗰50%股權賣畀第三者，即係話冇邊個唔妥邊個嘅情形存在。
好明顯嗰位分析員冇做功課。翌日，有啲報紙已即時「糾正」呢個睇法，兼夾寫埋可能賣畀邊個。點知，噚日輪到一間歐資行話網通呢個出售，令8號仔響祖國嘅前途，更加烏雲蓋頂，冇運行……好明顯，一個唔做功課，一個就唔睇報紙。
[email protected]