本報記者昨日於銅鑼灣訪問了入場看賀歲片的市民，普遍人都因為賀歲片已看得七七八八，才揀選入場看《雙子神偷》或《心想事成》，不過市民對兩者的評價均麻麻。
林小姐：
「睇咗《雙子神偷》，覺得吳京打得好好，反而Twins嘅阿Sa、阿嬌演技同以前一樣冇進步，入場前抱住好高期望，點知睇完失望，原來套戲會有下集，不過我六個friend入場，個個都話一定唔會睇下集，唔明點解個故事咁老套。我唔睇《心想事成》係因為聽個名都知爛片一套，夾硬引你笑嗰隻。」
馮小姐：
「睇咗《雙子神偷》，因為我本身好鍾意Twins，但對個故事就冇期待，純粹因為Twins而入場，動作場面OK，其他地方就唔好睇。有時間都想睇埋《心》，因為覺得幾搞笑。」
李小姐：
「睇咗《心想事成》，鄭中基好搞笑，第一次導演好有誠意，又多人做，好似有Miki同梁漢文咁，而《雙》個故事就唔吸引。」
鄧小姐與男友：
「睇咗《心想事成》，冇乜期望，笑吓就算，至於唔揀《雙》就因為聽人講唔好睇，本來想睇多次《門徒》，但因為買唔到飛。」
Vin：
「《心想事成》同《雙子神偷》都睇咗，主要因為新年冇嘢做，之前睇過吳京嘅《黑拳》，覺得動作場面吸引先去睇《雙》。而《心》比我預期中有意思，唔係得啖笑，鄭中基第一次做導演算係咁。」
採訪：李珮洳
攝影：陳偉權
