初三豬年首個賽馬日投注額創今季新高，初四就到港股紅盤高收，究竟馬場同股市邊度好搵啲吖嗱？網友happyma就喺《香港討論區》搞咗個投票活動，小小野人斬釘截鐵話：「梗係炒股，賭馬呢啲係玩吓啫。」除咗小小野人，大部份網友都認為炒股好搵啲，長短線皆宜，股價跌咗唔會渣都冇，賭馬就要一鋪定輸贏。
fundmanager就好理智咁分析：「就算馬會唔收行政費、政府唔抽稅，賭馬都係零和同財富轉移遊戲，有人贏必有人輸；但股票市場就不同，因為有公司不斷創造經濟價值。玩股票發達嘅有唔少人，舊年就好多人喺股市賺到錢，賭馬唔好話發達，連贏到層樓已經極少見啦。」
跌市唔會渣都冇
兩樣都有玩嘅eltonsiu話，兩者同樣要動腦筋，靠自己分析，不過，賽馬輸咗就冇，股票跌咗如果唔係等錢使，仲可以擺耐啲或者有機會升番。
不過，投票結果都唔係一面倒，因為唔少網友想刀仔鋸大樹，支持賭馬嘅觀點不離以小博大。Twho就認為，扑中隻十倍冷馬，中番條Ｑ就已經贏幾十倍。波馬股壇任縱橫則話：「一個賽馬日專賭一至兩隻穩Ｐ（位置），好過𠵱家炒駿雷（070）同抽新股多多聲。」i2world99亦和應道：「10元買三Ｔ可賠幾千萬，有邊隻股票有咁高賠率吖！」
贏面平均有六成
Kawalawa認為，賭馬同炒股都唔好搵，最好搵係「投資」，唔係「投機」，冇幾多「即日鮮」散戶可賺大錢，長線價值投資，始終有最佳回報。Casiofever就話：「炒輪就同賭馬一樣贏面好低，買正股比賭馬好少少，贏面有60%。」
馬迷同股迷各有論點，但論規模，05至06年度，馬季總投注額都只係得600億元，舊年股市成交額最高嗰個交易日已超過700億銀，反映大多數人賭馬都只係小注怡情，炒股搵食始終較實際。