新鴻基地產（016）嘅馬灣珀麗灣一直以環保掛帥，24小時交通管制，的士、小巴一律唔准入，住客出入只可以坐屋苑環保穿梭巴士或者渡輪。雖然交通唔方便，但係住喺島上面，有一份與世隔絕嘅度假感覺，空氣又相對較清新，吸引唔少年輕夫婦搬入去，扮吓楊過、小龍女過歸隱生活。
借的士佬過橋
不過，上星期有的士團體抗議，要求政府畀的士入去珀麗灣搵食。《香港討論區》嘅網友siu_keung就覺得件事好搞笑，仲估有幕後黑手發功，「住得入面都當住離島，想少啲車出入喇！不過，話分兩頭，如果成事樓價實升，究竟邊個係搞手？一係小業主搞鬼，一係大業主搞鬼。」小魔童就認為係新地搞鬼，「𠵱家巴士同渡輪都減班次，要補償番啲住戶等佢哋唔好嘈得咁勁，走去整班的士佬嚟發難，之後做好做醜出嚟做和事老。唔好畀我睇死，唔使好耐的士一定可以出入珀麗灣。」
victoriaahpak就覺得畀的士出入未必係壞事。「萬一頭暈身㷫要去醫院，島上連的士都無，真係好唔方便。」住喺珀麗灣嘅mawanppl覺得呢個講法多餘，「島上都有醫生診所，如果嚴重到要入醫院，咪搵白車囉。咁如果住分層大廈，有急事時壞𨋢點算？唔通跳樓咩？」victoriaahpak就反駁話，呢個係好實在嘅問題，「或者你哋珀麗灣居民會唔會諗吓，有乜方法去減少呢個風險，亦有助你哋樓宇嘅價格，好過喺度砌詞辯護啦。」
事實上自入伙以嚟，珀麗灣業主對交通問題都有好多意見，仲不斷同業委會、新地、運輸署周旋；亦有業主頂唔順，搬返出市區住。雖然歸隱生活係幾過癮，但凡人始終唔似楊過同小龍女咁與世無爭，又識輕功唔使搭車搭船，所以要入去住真係要諗清楚。