豬年紅盤高收，行情曾經跌過，但尾市都上番，恒指升83點，H指就升38點，逼近10000點大關。大市成交雖只得405億元，但炒賣氣氛好熱烈，50大上升股，升幅最細嗰隻都升超過1成，好多人發新年財。
基金股呢輪頻頻有好表現，一隻上市冇耐，但貨源肯定已歸晒邊嘅中國交通建設（1800），消息話好快會再開車，呢隻大價股，基金睇得好好，短線可見12元，中線目標係15元。
中交近日曾升上9.82元，調整咗幾日，噚日升勢再起，收9.60元，升9仙，一升破9.82元阻力，就會望空衝刺。中交去年12月中，招股價4.60元，連超額配售共發行44.2億股集資淨額約180億元，上市兩個多月，股價亦上升逾倍，但基金仲睇得咁好，有理由：
(1)中交母公司係中國交通建設集團，上市前大舉注資，包括注入滬A上市公司上海振華港口機械（600320）及路橋建設（600263），基金收到料，中交集團今年內會分3路注資，向中交、上海振華和路橋建設注入資產，將中交集團主營業務整體上市。
(2)中交係中國最大的港口及路橋建設商，其他基建更包括機場跑道、高架輕軌及地下鐵路等，現時係中國最大及全球第3大疏浚公司，亦係全球最大的集裝箱起重機製造商，行業龍頭股評級高，基金會長揸，股價亦長升長有。
盈利可持續高增長
(3)中國十一．五規劃將投放3.8萬億元於交通基建，大增73%，其中鐵路項目就達1.5萬億元，中交係「一哥」，在國家大興土木的大好形勢下，未來盈利肯定可持續高增長。
花旗集團最新研究報告就給予中交「買入」評級，目標價11.81元，理由係公司營業額強勁增長，受惠於營運部門進一步整合，利潤率會大為改善，未來3年盈利年複合增長率可高達40%，足以支持中交的高評級。
中交05年（12月年結）營業額832億元，而去年6月底的未完成合同量逾1400億元，06年預計盈利不少於28億元，只要利潤率改善1%，盈利就可增加數億元，非常有利。