好多人買股票，都係為咗想資本增值，賺多啲錢，最好就係趁低吸納有實力嘅優質股，等股價升到心目中嘅理想價位就沽出。喺《香港討論區》，好多散戶不自覺咁對股票產生感情，所以普遍認為股票真係「易買難放」。
網友Sunry1104話：「好多人都會咁諗，買咗股票返嚟，賺到錢嘅話當然唔想放，最好繼續賺落去；蝕嘅話又唔想放，希望等佢慢慢升番。」草莓女好同意咁話：「好股唔想放，怕買唔返，就算升到高位，都會同自己講高處未算高，仍然有上升嘅空間，始終都係唔捨得放。」正所謂「賣仔莫摸頭，摸頭眼淚流」，賣股都一樣，千祈唔好唔捨得。
尹天照笑言：「呢種心態的確係好矛盾㗎，如果自己手持嘅係優質股，會驚放咗之後，搵唔番第二隻代替，最好唔好迫自己賣啦。」
驚搵唔番第二隻
LeshitaTelalelu自稱同股票產生濃厚感情，尤其係賺過錢嗰啲，就算見到靚價都唔想賣出。forever88仲話，經常喺股票行見到散戶一邊賣股，一邊眼濕濕，惟有勸佢哋：「賣股莫摸頭，唔好太傷心！」
股評人陳永陸曾經以戀愛論股票，佢話：「若果係好嘅股票，你唔使同佢談戀愛，直情同佢拍長拖都得，若果佢係好嘅，今日冇同你嗌交，令你開心嘅，仲有啲驚喜畀你嘅，就繼續同佢拍拖，到有一日股票突然變壞，你咪放棄囉！」