噚日年初四吉日，連通勝都話宜開市交易，港交所同金銀業貿易場齊齊開市，華華都有去採訪，希望收到各高層嘅開工利是，過個肥豬年。雖然個個舊年係咁意買隻股票都賺到笑，但係今年嘅利是就完全同個市脫鈎，利是金額依舊，仲未必人人有份！
華華噚日跑幾場，第一場見到剛做完電台訪問嘅金管局總裁任志剛，不但止來去匆匆，仲兩手空空，冇準備派利是。當記者問完最後一個問題後即閃，快過快閃黨，連「恭喜發財」都講唔切。任總唔係孤寒，華華記得佢喺普通場合不嬲唔派利是，有一年金管局搬屋，去拜年時佢就有派。
馬局長利是最大封
第二場係金銀業貿易場，肥馬局長馬時亨，按慣例主持新春開市儀式。馬局長肥嘟嘟成個財神咁，既派金元寶，又派金幣，但唔夠佢嘅利是吸引，封封50大元，係全日利是之冠，不過手快有，手慢冇。
金銀貿易場踏正9點叫第一口金，馬局長就即刻派利是，全場起哄，然後嗱嗱臨答記者問題就快閃，搞到大家手忙腳亂，難為班攝記雙手忙住影相，完全冇機會接收馬局長美意，最後就連華華都𢭃唔到馬局長封利是㖭。金銀業貿易場理事長李德麟就冇親自派，大大叠利是轉交公關大姐處理，位位20蚊。
最後一場就係港交所嘅農曆年開市儀式，以往單拖出席嘅高層──行政總裁周文耀，今年同新主席夏佳理雙雙現身，夏主席仲帶埋紅噹噹嘅愛妻出席。周總裁派利是冇驚喜，仍舊20蚊，首次以主席身份出席嘅夏佳理都派20蚊利是，兩個都做到人人有份，永不落空。
[email protected]
