各大牌子係咪有秘密武器仲未使出？07上半年，摩記好淡定咁公布咗幾款新機型號，包括兩款滑蓋設計嘅Z8、Z6，以及摺機K3，雖然冇韓國LG同PRADA玩Crossover咁搶眼，但其中Z8就首度加入「KickSlider」開機設計，讓手機自己來調校貼面弧度，連女人都可以感受呢種貼面鬚刨嘅樂趣，舒服死！
據講Z8唔使任何操作，推蓋時將手機貼近臉頰，手機上半身會自動輕微彎曲，直至貼實使用者臉形；繼maxxV6後，Z8與maxxK3同樣配備HSDPA技術，支援3.5G，上網或單撈多媒體檔案都特別快，加埋Z8每秒播放達30格畫面，流暢程度直頭可媲美一般電影，至於質素如何就要等正式出街先有答案喇！
Z6採用
Linux-Java軟件
同時候公布嘅Z6雖並非3G手機，但支援GSM四頻，可漫遊歐美兩大洲國家，佢最大特點係具備Linux-Java軟件，既採用自家研發嘅Linux作業系統，又內置微軟WindowsMedia11多媒體播放器，兩者兼容，方便睇唔同格式嘅電影。至於售價及推出日期未定，大家可留意稍後公布。
記者、攝影：陳國輝