古巨基與林海峰（阿Jan）日前特地到香港廸士尼樂園視察，準備過年帶家人去玩樂一番，看見一班廸士尼朋友，基仔與阿Jan都不期然想起小時過年的百厭事，基仔會擲炮仗落街嚇人，阿Jan則在看騷時將擦地炮拋上台，看來香港禁止放炮仗相當正確。
古巨基與林海峰日前偕換上新年裝的米奇米妮拜年之餘，還有與三隻小豬合照，基仔笑說：「今年豬年，梗係要同啲豬豬影吓相啦。」
阿Jan謂以往農曆新年通常會四出拜年，近年卻增添了一項指定活動，就是相約全家人一起拍全家福，不過由於今年其胞弟林曉峰要到拉斯維加斯工作，故暫停拍照一年，阿Jan說：「影全家福係我家姐幾年前發起嘅，不過當時佢搵個攝影師我唔多滿意，於是我搵夏永康幫手影，結果變成我做搞手。」
影全家福留念
阿Jan謂年紀越大，越難找到一幅全家人開開心心望鏡頭的合照，通常都會有人視線偏移，他說：「𠵱家新年影全家福，有紀念價值之餘，最緊要係可以執相，班女人特別開心。」
至於基仔的賀年指定活動，是叫齊朋友回家向其父母𢭃利是，他說：「細個時就年年要返內地過，我成日用炮仗整蠱人。」基仔謂他與玩伴會燃點炮仗從高空擲落街，當炮仗經過中層單位的窗戶時就爆發，將屋內的人嚇一餐，他謂：「嗰陣百厭諗住嚇吓人，好彩冇整傷人哋，反而我自己試過因為炮仗條引太短，未掉出去就爆咗，爆到隻手又紅又腫，痛到入心，好彩冇流血囉。」
拋擦地炮上台
阿Jan在學生時代也曾整蠱過一位歌手，他說：「嗰陣喺大專會堂同成班同學睇騷，到某個歌星上台，邊個就唔好講啦，總之我哋好唔順眼，就拋啲擦地炮上台炸佢囉，後嚟有保安開燈捉人，我哋俾人點相，全部紅牌趕出場。」
採訪：蔡如玉
攝影：林德雄
協力：李珮洳
場地提供：香港廸士尼樂園
服裝提供：上海灘
髮型：MarkIpofHair（古巨基）
化妝：MaggieChoy（古巨基、林海峰）
