馬會新總裁應嘉柏上場，設午宴招待傳媒，成百人出席甚為熱鬧，應嘉柏係德國人，德文名字甚長，發音唔容易，馬會上下都叫佢做E-B（WinfriedEngelbrecht-Bresges）。E-B未嚟香港馬會做賽事董事之前，已經係德國馬圈知名人物，年輕時踢過職業足球。未上菜前，E-B上台講番幾句，一開始就講吓笑，佢話：「我係賽馬熱心分子，喺德國踢波雖然冇碧根鮑華咁出名，亦算係好手一名。」咁就啱晒，幾年前香港馬會聘請E-B做賽事董事之前，仲未知道馬會會主辦埋足球博彩，𠵱家就妥當咯，行政總裁竟然係馬與波專家，兩瓣都咁掂，世間少有，睇嚟E-B上場之後，唔只賽馬博彩不斷有新橋，足智彩方面亦會有嶄新大計，不過未到宣佈時候而已。左丁山諗到一個方法係賽馬Fun組（現在分B1B2B3三組獨贏賠率，在一點四至六、七倍之間）與足球混合過關。
呢個過關會幾好玩㗎，譬如二月十四日夜馬第七場三號馬金同德，係人都知勝望極高，呢場B1組賠率三倍：二月十五日凌晨四時保頓對阿仙奴，買客勝（阿仙奴）嘅賠率好似係一點九倍，照計都幾穩陣，如果馬會推出Fun組足球過關，左丁山會買一條第七場B1與阿仙奴客勝，二穿一，賠率乘埋有5.7倍，幾好吖。現在啲Fun組賠率甚低，與足球差唔多，故此兩者混合過關，風險唔算太大，況且逢係過關，馬會贏望高過五成，制得過之至。
以前黃至剛總裁上任前係台灣福特車廠總裁，對賽馬冇乜認識，馬會董事局請黃生，係想請一個「外人」以全新現代管理角度嚟為一間百年老店引入新元素，刺激機構活力；黃先生做滿十年，功成身退，馬會另請一位「內人」賽馬/足球專家管理，顯然係經過十年投注額下跌後（投注額下跌有好多理由，有排講），需要專才，不是通才，嚟振興賽馬投注額，為走進下降軌嘅賽馬事業注上新活力。以此角度睇，一位幾乎比得上碧根鮑華嘅賽馬專家做馬會總裁，深慶得人矣。