互聯網果真是當今最偉大發明，唔只足不出門能知天下事，仲可以買賣各國股票，其實港人可以買美股唔係咩嘢新鮮事，但美國人買其他地方股份就唔係咁易，皆因當地監管好嚴。
港人好消息 芬佬壞消息
不過，以花旗國為基地嘅億創（E*Trade），就話會即將提升佢哋網上交易平台功能，畀美國人上網買賣包括港股在內嘅外國股票，睇嚟呢個將成為主流，其他股票行亦會相繼跟隨提供呢類服務。
億創提供上網跨地買賣股票嘅新服務，直接受惠當然係花旗國嘅小散戶，因為佢哋有更多投資渠道選擇，對港股嚟講亦屬於好消息，至少多一門投資客路。
不過，有人歡喜有人愁，華華相信，對芬佬嚟講肯定唔係好消息，因為唔少美國人透過基金投資外國股票，𠵱家億創提供上網買賣咁方便嘅渠道，或多或少會搶走一班DIY客人親自操刀投資。
[email protected]