美國人鍾意先使未來錢，導致債台高築。該國消費者嘅債務總額已高達1萬億美元（約7.8萬億港元），比1989年翻咗三番，相當於超出美國06年國內生產總值（GDP）8%，欠債額仲有上升趨勢。有專家擔心，呢個情況會觸發破產潮，最終導致美國出現經濟危機。
債務越來越重，賴債問題可能漸趨嚴重。rebellistic喺《MSN討論區》大呻：「過去5年，我朋友欠我大約1.6萬美元（約12.5萬港元），佢遲遲都唔肯還錢，令我覺得好煩，唔知點算好？」
TLoony當頭棒喝：「專家話過，朋友向你借錢，你就唔好諗住對方一定有錢還。你當初應該查明對方嘅還款能力，先至好借咁大筆錢畀佢。𠵱家收唔到錢，真係自作自受。」CRONEWITCH話：「你朋友如果簽咗借據，你可以去法庭向佢追債，但佢可能因財失義，唔再同你做朋友。」
賴債成風 設法追數
Looking4ABargain講：「呢啲咁衰嘅朋友要唔要都罷，你應該叫佢做多份兼職，或者將啲舊嘢拎出嚟拍賣，甚至去銀行做樓宇按揭，總之一定要籌錢還債。」
Ruger1教路：「你應該去法院向佢追債，要求法院扣起佢嘅工資，用嚟還債，不過，1.6萬美元可能超出小額錢債法庭嘅審理範圍。你亦可以將債務賣畀收數公司，或者請收數公司同你追債。」
美國個人儲蓄率去年跌到負1%，係1930年代「經濟大蕭條」以來最低；現時每月都有超過一半信用卡卡主無法全數還款，每月平均赤字高達2000美元。美國總審計長瓦爾克警告，美國人如果唔馬上處理財政問題，美國可能重蹈古羅馬帝國嘅覆轍，最終走向滅亡。