縱觀香港地一班60開外嘅富豪，成日都話冇諗過退休，又話自己好好身體，唔做唔舒服云云，咁實情佢哋係唔做唔知自己身體好？抑或根本後繼無人，班第二代完全唔成氣候呢？不妨同大家分享一個近期發生嘅例子！
話說某華資老牌磚頭公司，今年適逢開檔幾十周年紀念，話事人「單單」見自己成日唔夠人哋威，於是諗住大搞攞番個彩，同佢個寶貝仔「舊舊」出吓風頭，於是乎話交晒畀「舊舊」發板，「舊舊」亦都以為今次可以響班老臣子面前威番鋪，證明自己大個仔！
灣仔女強人出手幫忙
不過，收到老頭子order後，開心唔夠一個禮拜，「舊舊」就遇到挫敗，話說甚少落手落腳嘅佢，真係畀心機搵自己啲蒲友攞意見，以為呢啲大龍鳳，搵娛樂圈中人度橋實冇衰，殊不知老頭子話就話浸過洋水，性格西化，但骨子裏同其他華資家族老一輩一樣，講就交晒畀你搞，但個個proposal都ban晒你！
響連續十幾廿次俾老竇彈橋後，「舊舊」成個人謝晒，於是死死地氣班救兵！聽溜冰場辛康納利講，有間公關公司一路有湊開佢哋，某日成個失戀樣嘅「舊舊」，殺上去乜都唔講，淨係order嗰位老闆灣仔女強人，幫佢搞掂佢老竇，仲話唔使再話佢知搞成點云云！
Sell橋單單禍耐人尋味
咁公關界就開始揣測「舊舊」究竟sell乜橋畀「單單」呢？無理由一單都唔成功啩？唔通佢叫老竇到時上台表演花式溜冰？呢個周年慶典真係要拭目以待！
Bytheway，咁小事都唔放手畀個仔，更何況係成個家族事業呢？睇怕「單單」都仲有排做喇！
[email protected]