響網上銀行越嚟越流行嘅今日，網絡安全成為銀行成功爭取新客仔同留住舊客仔嘅首要條件，不過，亦成為咗黑客及靠科技犯罪嘅人士其中一個主攻目標，內地銀行亦冇得倖免。但係佢哋幾好彩，事關有位姓郭嘅熱心IT界市民，響發現咗建行、農行同埋民生三網頁存在漏洞後，主動聯絡咗中新社，由記者通知銀行「補漏」。呢位郭先生，唔知係唔係內地最大網絡救兵「中國紅客聯盟」嘅成員呢？
郭先生除咗舉報，仲親身示範畀記者睇點樣做假網站及套取內地銀行存戶資料，佢輸入一啲字符，銀行個網頁居然彈出「Welcomeshareyourmoneytome」嘅類似廣告物體，並迅速將用戶連接去另外嘅網址。郭生話：「如果我再做一個網站，如此修改後轉接到上面，就可以神不知鬼不覺地獲取到用戶的賬號和密碼，對銀行而言是一個致命問題。」
咁大鑊，中新社記者梗係第一時間搵番受影響嘅銀行啦，之不過，始終都係細銀行靈活啲，民生收到料後，已經即刻完成補漏，而農行同建行就話要check吓有冇咁嘅事，有就會補飛，呼籲各位存戶小心啲。
[email protected]
