上個禮拜五（年廿九）6點鐘無綫突然抽起咗之前播開嘅《開心賓館》，重播鄭少秋嘅舊劇《御用閒人》，雖然舊年佢幾套新舊劇集對個市冇咩影響，大市照樣升完再升，秋官都好開心咁話終於洗脫寃名，但似乎大家對「秋官效應」尚未完全安心。
淡友機會 等執平貨
網友威靈頓打開電視見到秋官個樣，即時憂從心上起，喺《香港討論區》內發出「警訊」話股市毒藥、散戶大敵「秋官」又出現，個市有危險，隨時會跌。咁又係嘅，即使冇「秋官效應」，個市連續升咗4年幾，根本上都好容易出現大調整甚至轉入熊市啦！
Dadadede亦擔心「丁蟹效應」嘅威力，隨時會推低大市。但Elton-cat就另有見解，「換個角度嚟睇，跌市亦可以係執平貨嘅機會！」Peterwu1215仲好興奮話：「要快啲買Put輪傍身嘞！」Poweranger就好醒咁話：「我一早就清晒貨啦！𠵱家全部都係『御用閒錢』，等吓先，有機會先入平貨。」
秋官嘅威力唔止散戶擔心，連大行都曾經撰寫報告提及，04年3月里昂便分析因「秋官效應」而產生的股市走勢理論。秋官扮演丁蟹嘅《大時代》喺92年11月2日至12月25日播映，拖累港股當年急挫達12.7%，從此「秋官效應」正式確立。
無記整蠱 拉長嚟播
網友塔利班戰士仲厲害，喺網上貼咗當年《御用閒人》播映期間（05年3月14日至4月8日），對港股嘅影響──恒指喺開播翌日即跌90點、H股指數就挫79點；而套劇播映期間，恒指高低波幅只得578點，累積跌幅就有240點、H股指數則挫108點。首播時候係每集一個鐘，但今次只播半粒鐘，即係話今回要用成40日，咁咪即係要驚多一倍時間……