好多人會搵堪輿學家睇吓風水，或者問吓運程，特別係農曆新年，大家都會好奇想知吓事業同戀愛運程；對於散戶而言，相信佢哋最關心都係未來股市走勢嘅預測。
不過，最近有報道指，玄學家預測大市嘅準繩度相當唔掂，而且引嚟唔少網友批評佢哋都係「掛名」而已，唔好盡信，反而信自己嘅眼光仲好。
去年玄學家普遍認為，06年港股會好波動，年中會出現較大嘅調整，到年尾先至回穩，整體更冇突出表現，部份人仲話港股可能會小漲大回，跌幅約一成。事實上，恒指雖然係5月中之後出現過小股災，跌近2000點，但其後已收復失地，全年更大升約5000點。
所以，網友tke666話：「風水佬都係估估吓，唔好盡信，佢哋嘅技術分析好多時都唔準。」
尹天照仲話：「如果信佢哋嘅分析去沽貨，一定會損失唔少；相反假如唔信，由去年6月入市同持貨至今，就真係賺到笑。」
網友jaychan88笑言：「佢哋完全得個吹字，吹得就吹，毫無分析可言，十幾個大師都冇幾多個準，信自己嘅眼光好過。」樂樂仲建議咁話：「佢哋嘅測市準繩度，大家心中有數啦。反而同佢哋對賭，應該可以賺唔少。」