16強歐聯，正如車路士後衞卡維奴所講：「除技術之外，還看幸運之神眷顧邊隊！」所言非虛，車路士作客波圖，我也只有一半信心估車仔會出線！
波圖真係咁勁？係勁！不過係當年有摩連奴嘅波圖。雖然睇幾場直播，唔可以以偏概全；但係，波圖比我嘅印象係西甲中游球隊水平，我亦相信呢個事實！以前嘅好球員都走晒，𠵱家可以靠就係主場球迷嘅打氣聲。又或者好似卡維奴所講，邊個夠運就可以贏。我會估車仔會睇住踢，和波係目標，返到主場先淨勝對手。
當然，車路士可以談笑用兵，令我興奮嘅係車路士過去咁多場波，有弱隊幫手練兵，增強自信心。另外，車仔今年歐聯已落入只許勝，不許敗嘅絕境！億萬大軍，再無成績交代，有何顏面！我相信車仔會上下一心，搏老命，殺入歐聯決賽！
另一場歐聯，我估國米會俾華倫踢出局，理由只有一個：國米喺意甲仲未遇過同級對手！華倫今仗只要和波，國米肯定有難！
周鵬
商業1台《球迷集中贏》主持
電郵：[email protected]