獻精兵日後有望入局
2月20日，大年初三，傳統稱為「赤口」，不會出外拜年，煲呔百無禁忌，學民主派搞競選花車巡遊，向市民拜年，袋巾梁陣營繼續休息，單仁聽聞他們明天復工。
煲呔陣營將特首小圈子選舉當作直選來部署選舉工程，過去三日公眾假期，袋巾梁休戰，煲呔頻頻落區，獨佔傳媒報道。今次花車巡區，早前曾說過全力撐煲呔的民建聯，至少出動10位民建聯青年成員，包括馬力愛將張國鈞及張瑞鋒，全程貼身服侍煲呔，又幫手派貼紙。
單仁之前說過，煲呔競選辦秘書長許雄去信民建聯，對民建聯自動獻身助選活動大潑冷水，惹來不少民記高層埋怨，責怪煲呔太過斤斤計較，但民記昨日肯不計前嫌，除了一眾民建聯高層「大方」外，當中也涉及民建聯與煲呔互惠互利關係。
有政界人士向單仁分析，煲呔在新一屆政府中，必須挑選一系列年輕精英入局做副局長或局長助理，要得煲呔青睞，就算有民建聯推薦，也要向煲呔顯示有其真正實力，所以民建聯借今次機會，向煲呔獻上十數員精兵，讓他們盡情在煲呔面前力爭表現，由煲呔親自揀蟀，日後民建聯再推薦他們，煲呔也心裏有數，不會出現「貨不對辦」。
無謂與競選辦糾纏
至於之前許雄和民建聯的「小風波」，民建聯副主席譚耀宗昨天對單仁說，他們會按照原定計劃，在未來兩星期在18區就特首選舉向市民收集意見，但調查不會再以「點樣做好呢份工」為題，改為廣泛地徵詢市民對未來特首的期望。單仁覺得民建聯聰明，無謂與煲呔競選辦糾纏，不如快些落區爭取民意更好。
袋巾梁方面，楊森今日會回覆馮檢基，袋巾梁是否參加他們主辦、那個遭「閹割」的特首候選人論壇。據單仁打聽，雖然民主派內，例如公民黨湯家驊，認為論壇沒有公眾參加，又不設互相辯論，大部份時間用於各自表述政綱，不去也罷，但張文光就覺得，都算有個機會透過電視直播畀市民了解傑哥嘅理念。
袋巾唔去論壇更有利
據知，袋巾梁係想去個論壇，唔想益煲呔唱獨腳戲，同時繼續爭取畀公眾入場，直到最後一刻。至於煲呔方面，據知煲呔甚至連畀公眾15分鐘透過電郵發問都反對，淨係想畀選委問，搞到連啲親煲呔選委都覺得過份！佢同許雄噚日巡區時都冇回應，係咪會出席論壇。
有民主派人士同單仁講，袋巾梁拒絕出席，較出席更有利，「冇咗袋巾梁，個論壇變成煲呔個人宣傳節目，嗰班選委冇錯可以繼續搞，但電視台、電台唔敢直播，因為一定俾人投訴幫煲呔宣傳，咪等個論壇無聲無息開完都冇人知！」單仁都覺得呢招唔錯！
逢周一至周六見報