上個禮拜啱啱過完情人節，可能因為經濟好轉，美國人今年送禮都比舊年疏爽。根據美國零售業聯會（NRF）嘅調查發現，啱啱過咗嘅情人節，平均每人消費119.67美元（約933港元），比舊年多19%。有63.4%消費者打算喺情人節當天送禮，而今年情人節嘅消費總額可望高達169億美元（1318.2億港元）。
Scheerlady1122喺《MSN討論區》話：「我用咗大約30美元，買件玻璃飾物送畀老公作為情人節禮物，上面仲刻有我哋嘅名。老公送畀我嘅禮物差唔多值40美元，佢以前係喺情人節向我求婚，所以我哋好珍惜呢個大日子。」
emmom講：「今年情人節，我送朱古力畀老公，仲送咗啲潤唇膏同沐浴用品畀個女，埋單合共60美元。」SullyKitty就比較慳皮，希望過一個低調嘅情人節，佢已經同男朋友約定，每個人嘅使費唔好超過50美元。
男人出手較闊綽
不過，部份網民冇諗過送禮，SmarterThanEver話：「我同老公都杯葛情人節，唔會送情人卡、鮮花、珠寶等禮物，亦唔會去高級餐廳。我哋全年都真心相愛，所以唔使特登喺情人節送禮。」Tablefor2就打算喺情人節過後先至送禮，因為到時可能大減價，有機會執平貨。
DawnM講，佢同老公喺今年情人節都要喺餐廳返工，趁機𢱑銀，仲可以體會一吓餐廳入面嘅浪漫氣氛，「咁樣先至係慶祝情人節嘅最佳方法」。
根據NRF嘅調查顯示，今年情人節，美國男士較為慷慨，佢哋平均願意花費156.22美元，比女士多1倍，女士平均願意消費85.08美元。