新年祝願，大吉大利，股市日日起，人人水頭充足，金銀滿屋，最重要係身體健康，諸事順景，恭喜！恭喜！
今日開市，揀馬鋼（323），「生意生」意頭好，公司前景又掂，豬年佳選之一。
睇好馬鋼，理由好多，個個都好吸引。
(1)鋼鐵價格去年由低位回升，但表現幾反覆，第2季反彈，第3季回一回，第4季又再上，今年點睇？大行認為中國及全球供應會收緊，鋼價可上升5%至7%。鋼價上漲，鋼鐵股自然好有利。
(2)馬鋼盈利跟鋼價走勢出現V形反彈，05年上半年賺21億元，第3季只賺5.77億元，第4季縮到只得1.96億元。
06年業績好番好多，第1季至第3季分別賺3億、7.9億同6.07億元；第4季鋼價回升，預計盈利可去到10億元，全年合計賺27億元，每股盈利41.8仙。
毛利率維持高水平
(3)馬鋼產品組合進一步改善，去年鋼產量比預期的2800萬噸為多。中國大力發展鐵路運輸系統，而馬鋼係中國唯一生產火車輪的工廠，產量可持續大增，毛利率亦可以維持在43%或以上的高水平。
(4)馬鋼主要生產生鐵、粗鋼和鋼板，目前興建中年產500萬噸的薄鋼板廠房，預計在今年第2季可投產，薄板主要用作製造汽車及家電，在內地供不應求，馬鋼新廠投產將可令盈利大幅上升。
07年鋼價再升，加上新廠投產，馬鋼盈利每季可賺超過10億元。
高盛係馬鋼大好友，預測07年盈利49億元，每股盈利75.8仙，以10倍PE計，股價已可升見7.50元。08年盈利63億元，每股賺97.5仙，PE更低。
馬鋼上月中見過5.87元，跟住回落，完成圓底收集，假前升勢再起，高收5.12元，重上10日及20日線之上，MACD亦將出現「雙牛」入貨訊號，短線股價可重上5.87元，中線目標係7字頭。