今日係年初四，唔少人都仲喺度放緊新年假，周圍去拜年𢭃利是，真開心；不過如果大家去開紅磡，不如順便去參觀吓位於黃埔花園內嘅黃埔名車交易廣場，入面除有過百部名車俾你慢慢睇之外，其中一家叫偉昌汽車嘅車行，仲特別展出最新嘅ToyotaAlphardRoyalEdition喎！部車個Look雖然望落同普通嘅Alphard差唔多，但原來入面有套DVD連5.1影音系統、後排15.4吋LCD大屏幕，兼且仲有埋按摩椅㖭。咁仲唔止呀，原來車尾仲有埋倒車攝錄鏡頭，咁就倒後泊車都無有怕。至於車價方面，聽佢哋講話係$519,000起，買車仲送你一封大利是，想過吓做老闆癮嘅你，不妨諗諗喎！
另外仲收到風，話佢哋會引入埋全新HondaCivicTypeR；今次部車雖然係4門版，但引擎則會係一台2.0公升i-VTEC型號，馬力輸出隨時超過220匹。新車有望喺4月前嚟到香港，預售價為$310,000起，睇嚟今次又係班TypeR「粉絲」出動嘅時候啦！
記者、攝影：鄭達基