送狗迎豬,平日仙都唔係好仙吓嘅長毛,喺狗年嘅最後一刻最後衝刺,竟然俾佢成功收數累積達百幾萬!不過……啲錢並唔係佢自己袋袋平安嘅,而係幫百幾個地盤工人收㗎啫。
年三十晚,長毛去維園幫手睇社民連個檔時,仲好得戚咁嗌咪揚呢單料出嚟,當堂攞晒威,好多人聽到都拍晒手,搞到長毛當堂成個大明星咁款,唔怪得佢留到年初一朝早8點幾先捨得走啦!不過單身寡佬冇所謂,長毛話自己返到屋企大覺瞓到晏晝4點鐘先起身,睇吓波,初一就咁過咗。
今日佢會搵煲呔「拜年」,雖然煲呔實唔會派利是畀佢,但長毛就話會送份大禮畀煲呔,叫佢生生性性做好份工!