當年中國加入世貿，經濟有幾好，大家見到。舊年越南加入世貿，觸動唔少市場人士嘅神經，幾隻越南概念股升到飛起，股王A有斬獲之餘，仲叫敏妮幫佢發掘其他投資機會，但敏妮忙到氣咳，將個波踢咗畀光頭仔，點知同股王A拜年時佢話：「敏妮究竟喺香港有冇得買越南基金？我前嗰排睇報紙，話有隻JF嘅越南基金一公開認購就滿額，點解你唔話我知？」
「光頭仔咪話咗你知囉，你嗰時掛住炒新股，冇理到。」
光頭仔：「係呀，我講咗你聽，香港得一千零一隻越南基金，一開就滿，一般人根本買唔到。」
股王A：「你睇和黃旗下嘅和記黃埔港口宣布進軍越南，敏妮你真係要幫我搵到投資越南嘅渠道，總之有越南基金我一定瞌埋眼買。」
VOF揸越南藍籌
「喺英國掛牌嘅你有冇興趣吖？」
股王A：「講嚟聽吓係乜先。」
「有隻越南基金喺倫敦交易所掛牌，叫VietnamOpportunityFundLtd.（VOF），係由一家越南公司VinaCapitalInvestmentManagement成立嘅，據佢哋網頁上面嘅資料，隻基金揸咗一啲越南藍籌股，至於基金嘅五大持股當中，揸得最多嘅係越南最大乳品生產商越南乳品公司Vinamilk。資料顯示，今年1月份呢隻基金每股資產淨值升咗14.6%，至2.91美元。除咗呢隻基金，同一家公司喺舊年3月成立咗另一隻專門做地產嘅VinaLand。」
邱sir：「聽落幾吸引噃，反正香港唯一嗰隻越南基金滿咗，等我炒吓英國股，敏妮香港人點炒英國股？」
炒英國股使費貴
「去開個炒英國股嘅戶口囉，輝立有得做，但使費幾貴，佣金係成交額0.5%，最低消費60英鎊，仲要畀成交額0.5%印花稅。」
邱sir：「有得贏錢就得啦。」
「隔山買牛，冒險咗啲噃，所以我搵到都唔敢同股王A講。」
股王A：「敏妮，我未至好似邱sir咁，唔做功課就話去買，我係投資唔係投機，莫講話炒英國股使費貴，呢隻基金我又唔熟，都係等我研究吓，雖然恭喜發財好易講，但講吓就發嘅，香港就冇窮人啦。」