今日初三赤口，一概拜年活動都可以暫停掛免戰牌！忙咗兩日，都應該出去走走食餐好；今年雖則市道好，但新年「特價」加二、加三情況都唔算常見，而且好多大酒樓都趁金豬年，大推應節「金豬菜式」，食完包你家肥屋潤、黃金滿屋。記者：朱崇德
攝影：陳盛臣、何家亮、伍慶泉、周旭文
Model：Naomi、Isabel
傳統意頭菜排場夠照
金豬年點都要整隻金豬全體先至應節，入到海逸皇宮，樓面放枱都上百席，去慣「小菜小炒」一類的海鮮酒家，突然搵到間玩傳統「大酒席」，排場氣勢返晒嚟！最緊要位多樓面大，新正頭要等開飯唔老嚟嘛！
菜式都係老派講鑊氣一類，一般小菜小炒講求係簡單易出菜，大酒席者講求係出菜仔細，好多繁複菜式一般海鮮酒家都唔願整，不過喺度就可以食到，而且最重要係發財好市、橫財就手，喺度食先至夠傳統風味。
金豬獻瑞祥（乳豬釀糯米飯）$380
一坐低先嚟隻金豬全體，就咁睇點會知內有亁坤！乳豬全隻去骨，內裏全釀生炒糯米飯，好似滿肚黃金粒夠意頭。糯米飯以臘腸、膶腸、叉燒、花生及雜菜等配料炒成，淨食香口非常，釀入「豬殼」燒至脆皮，肉汁及香油被糯米飯吸晒，令飯身更香更軟；1隻豬足12人食，$380唔算太貴，新正頭埋肉枱切3幾斤燒肉都成百蚊落樓啦！點菜要1日預訂，如果定單唔太多，早上訂、晚飯有得食！
事事添如意（士多啤梨排骨）$68
可以話傳統咕嚕肉變奏，以士多啤梨替代，取其「士」同「事」的諧音，故名事事添如意；士多啤梨酸酸甜甜，同菠蘿整一樣咁開胃，更好味處係多了一陣士多啤梨獨有的鮮香之味。至於排骨就選用「下肋骨」的新鮮腩排，冇乜骨，而且仲黐住腩部的筋位、肥肉，食落一層層又鬆化。
五福喜臨門（燒味拼盤）$180
一般燒味拼盤通常雞、鴨、豬乜都有，呢個五福喜臨門就齋玩全豬宴，乳豬、滷水豬大腸、白滷水豬頸肉、叉燒、熏蹄放滿一隻15"大碟，真係夠成圍枱人食，當中重點推介係呢度嘅肥燶叉燒，半肥瘦，微微燶入口即化！至於個熏蹄亦做得好，入口清爽又帶點玫瑰露的清香，完全唔膩。
橫財包就手（豬手鮑螺片）$88
豬手係橫財，加埋鮑螺片就變成「包就手」，豬手做得十分軟腍，唔使勞煩大家用刀叉切，只需用筷子輕輕一夾，已經骨肉分離，烹調技巧的確幾高招；更難得的是入口微嚼感皮肉彈牙，但又清爽唔膠口，呢啲咪做開大酒席、老派菜嘅功力囉！
海逸皇宮大酒樓（31562861）
地址：紅磡海逸道8號漁人碼頭3樓323號
創新諗頭菜送揮春
海景嘉福酒店今個新年都做咗個「金豬餐」！全部創新「諗頭＋意頭菜」，3熱葷配3小碟加燉湯，都係每位$238（2位起），老實講同出面一般酒樓比平好多，而且屬酒店中菜，出品更有保證！據知過年期間，呢度仲有專人同大家寫揮春，真正墨汁毛筆字，就住你求乜寫乜，屋企啲豬仔膠揮春，換過佢啦！
萬壽茄子（人參肉醬釀茄子）
原條茄子上碟，仍能做到大紅大紫，有意頭、技巧高！面層切開釀入豬肉，再加蒜茸、亁葱、煙肉碎燜熟，茄子原條清香、肉汁香料引味，惹味醒胃；別出心裁是以蜜餞鮮人參拌菜，入口甘甘甜甜，更減油膩。
年年豐足（雲腿川釀竹笙）
嘩！做乜竹笙都可以食到脆口「索索聲」？原來以厚身竹笙，釀入蝦膠及雲腿；竹笙因夠厚兼剛剛僅熟，先有如此爽脆口感，食到入裏面的蝦膠，即轉為彈牙口感，當中微微有雲腿肉香輕散而出，吃一口有多重變化。
大展拳腳（滷水豬腳仔）
滷水豬腳仔的皮面以冰水特製過，入口特別爽脆彈牙；肉身則多筋少油脂，極有咬口。
淮杞唐排燉響螺
以唐排配響螺、淮山、杞子、陳皮加薑清燉5個鐘，湯汁清甜散發藥材微香，而且仲有滋陰、明目等藥用功效；由於藥性屬溫補，老人細路都啱飲。
海景軒（27312883）
地址：尖沙嘴東部麼地道70號海景嘉福酒店B2層
粵菜加西式汁變新風味
今日初三！趁好多公司都仲未開工，掉返轉頭走去商業寫字樓區名店食飯，包保唔使逼又唔使爭！據知間翠玉軒平時係附近老闆級至愛，菜式簡單、調味富層次，而且環境開揚間隔鬆動，有私人空間，食都食得開心啲。講到菜式方面，最特別之處是將粵菜加上西式汁醬，中西合璧好新鮮！
一口鍋粑乳豬$88
一口鍋粑其實是一款粵菜的變奏，鍋粑其實是指飯焦，再夾以乳豬件、青瓜片、金華火腿同食，一口脆、鹹、爽、鮮乜都齊！汁醬好特別，是以香草、牛油配忌廉的甜甜西菜汁，同乳豬醬有異曲同工的開胃特色，但西溝中！口感勁新鮮。
滬法火方製魚翅$498
價錢$498好似幾貴！不過一盅足4至6人份，即刻抵晒！以牙籤粗的原塊魚翅，加以老雞、雲腿清燉6個鐘，1份料配2份水，湯汁金黃清甜，雞肉、火腿香味一開充斥一室芳香，亦係老派上海菜作法，食完包你全年興旺、風生水起。
清宮御膳肉$88
原嚿燜肉呢啲老派菜係筆者最愛，平時屋企好難做得好！以2吋厚身的大腩排，配以宮廷古方，以紹興酒增其味、紅穀米上其色，再以冰糖令其肉身腍軟，屬傳統做法，起碼燜上2小時，入口鬆化無油，肉香鮮嫩。
發財好市大利$128
原隻蠔豉脹卜卜，配以大條豬脷真係好意頭！留意後面的黑色「發財」，為咗響應保護地球免受沙漠化威脅，改以日本海產水雲代替，口感有幾分似，撒上麻油後更是難分其味，據知比真髮菜貴成倍。
黑醋甜脆肉$88
飲食除咗為口福之樂，健康都好重要！呢味酥炸小豬柳條，撞以黑醋作汁醬；黑醋較平時食開的白醋及紅醋味溫而暖胃，入口香香甜甜，再配以一片老薑拌食，真係成個身都暖晒。
翠玉軒（25251163）
地址：中環交易廣場2座4樓
玩精緻賣相夠驚喜
講到玩得別致！今年沙田帝都軒為咗大家一帆風順、大吉大利，竟然連成隻帆船都做咗出嚟，其他新派菜仲有藍莓蒜香骨等，不過講到重量級，係佢哋隻紅燒圓蹄！成個湯碗口咁大，足成圍枱份量，食完包你橫財就手。
一帆風順
（蒜片蘆笋豬柳金瓜船）$108
一上枱真係開心到震！講一帆風順，估唔到成隻船都砌咗出嚟，船身以隻隻南瓜所雕成，帆身更是薄切南瓜片；寶船所盛載的是鮮炒的蘆笋、豬柳條、蒜片、紅椒，惹味非常，據知食時仲可以撈埋軟腍的船身一齊勺！
橫財就手
（紅燒圓蹄）$250
呢個橫財就手一向都係帝都軒招牌菜之一，以碗口大的圓蹄作此菜，雖以簡單的薑、葱、八角、生油、老抽調味，但工夫在慢火細燜時對火候的操控，入口肉質鬆化、皮脆嫩滑，所以用筷子一夾即起；而且食用時唔會感到油膩，因為多餘的油份已於燜煮時逼晒出嚟。
三星拱照
（藍莓蒜香骨）$88
以3條小豬仔髀砌成拱門，祝願大家福、祿、壽三星拱照，的確幾有心思；小豬髀是末代港督肥彭老家的英國巴庫豬，據酒店稱是全港獨家，而味道會比本地豬肉味道更鮮甜。小豬髀厚上一層蒜香炸粉，點個酸甜藍莓汁，口感好西式。
帝都軒（26943939）
地址：沙田白鶴汀街8號帝都酒店2樓