歐聯16強首回合鬥華倫西亞前夕，我求大俠有幸一會國際米蘭前鋒基斯普，同佢大講波經，睇吓佢點睇球隊嘅聯賽16連勝，同埋歐聯對手，「基佬」賽前奉勸隊友一句：「踢波前一日要瞓好啲！」
今季聯賽轟入8球嘅「基佬」，同我求大俠講：「外界覺得連勝紀錄對球隊構成極大壓力，其實冇呢回事，因為球隊粒粒皆星，大家唔會場場踢晒，所以落場時都好有鬥志，但聯賽唔同歐聯，唔可以混為一談！」
主場硬撼剛喺聯賽痛宰巴塞嘅華倫之前，「基佬」苦口婆心咁提醒隊友要唞足精神：「休息對雙方都好重要，我敢講如果比賽之前一晚瞓得唔好，第二日場波一定輸，所以我哋都唔敢掉以輕心。」唔知佢言下之意，係咪暗示畀拍檔阿祖安奴聽，唔好夜蒲太多呢？
讚對手突擊有效率
「基佬」之後對華倫評論咗幾句：「佢哋好意大利化，頑強嘅防守，加上兩名擅於反擊嘅前鋒韋拿同摩連廸斯，真係1分鐘都唔可以走甩……」人大咗係長氣啲，「基佬」越講越開心，可惜我求大俠聽唔晒，已俾工作人員趕走！