噚日開年，八方嗰兩個讀緊幼稚園嘅姪仔嗌交嗌到赤口都唔停口，XYZ滿場飛。噫，佢哋係句句英文唔係講粗口，廣管局千祈咪撲出嚟勸喻喎。不過因乜解究咁勞嘈呢？哦，原來係為豬年個「豬」字英文點寫爭餐飽，一個話「Pig」（豬），另一個話「Boar」（公豬/野豬），真係嘈過豬叫。
查實十二生肖係中國人曆法，英文只要意思冇錯，唔會指豬為肉（Pork），西人明白就冇問題，所以Pig同Boar都啱，甚至寫Hog（食用豬）都得。雞年有更多寫法，包括Hen（母雞）、cock（雄雞）、Chicken（雞仔）、Chick（小雞）等，最多人用係Rooster，即係公雞。
兩個細路好醒目，發現牛年會用XO（公牛），而唔寫母牛嘅cow。而羊年會寫Sheep（綿羊）或Goat（山羊），兔年多用Rabbit少用野兔嘅Hare，其他生肖就冇乜爭議，都係Rat（鼠）、Tiger（虎）、Dragon（龍）、Snake（蛇）、Horse（馬）、Monkey（猴）同埋Dog（狗）。