過完大年初一同初二，花車、煙花睇過晒，跟住仲有乜好節目？初三為赤口，傳統上不宜親朋戚友見面，免得容易動氣結怨，所以今日最多人揀拜神！論初三最多人揀嘅，肯定非沙田車公莫屬；一早去到求完籤買完轉運風車，晏晝一於去埋粉嶺蓬瀛仙館食齋，喫飽梗要運動輕鬆吓，尾程順道去埋天水圍濕地公園親親大自然，話唔定見到小鱷魚貝貝同你拜年！一家人去完呢3大景點，可算走勻半個新界，變相係行咗個新年最大嘅運。
文：馬大雄 攝影：陳盛臣
Model：Ricky，譚太，雲盈
Point1
赤口拜神轉運
好多人都知年初三去拜車公，但點解會年初三去拜？原因好簡單，因為車公誕其實係年初二，但年初二人人又拜年又睇煙花，再加上第二日年初三係赤口，一般市民呢一日都會Dayoff唔拜年，倒不如將拜神活動轉為赤口那天，令新年節日分配得更平均，就係咁初三就成為車公廟最旺嘅一日。
廟外咪錶位將關閉
車公廟位於大圍火車站隔籬，進入大圍後沿車公廟路駛，到翠田街交界轉入便到。但要留意年初三車公廟門口咪錶位將全部封閉，惟有將架車泊喺對面停車場。其實去車公廟除咗大人可以拜神外，更可以轉吓獨有風車，小朋友又可以開開心心，買番個象徵風調雨順嘅花碌碌小風車，名副其實大人細路都啱去！不過提提你，初三當日一定人山人海，小朋友入廟時要小心香燭。
轉風車其實都有秘訣，如果去年事事順境，就要順時針轉，如去年事事不濟就要逆時針轉，務求轉吓運，千祈唔好搞錯，否則有乜唔如意就唔好賴我！此外，車公廟大時大節會擺個大鼓喺廟內，只要打響個鼓，就代表向車公SayHi，我有嚟拜神㗎，今年射住射住！
車公廟
地址：沙田車公廟路
泊車貼士：車公廟旁的咪錶停車場會在初三封閉，最近惟有去對面馬路嘅時租車場，收費$5/1小時，約有80個位。
Point2
食齋鱈魚唔會肚屙
好多人都會喺新年食齋，車公廟無齋食，不如開車直入蓬瀛仙館，只需沿吐露港公路一直行，之後接粉嶺公路嘅和合石出口，沿百和路駛約5分鐘便到。
呢度啲齋菜出名到達官貴人都幫襯，唔好以為好貴，2人餐只需$105，10人餐都係幾百蚊落樓。菜式之多亦媲美一級大酒樓，拍攝當日便嚐了唔係油魚假扮嘅齋鱈魚，食落竟然有點點魚味，既健康又美味！齋廚部喺過時過節經常客滿，為免一場嚟到無得食，都係事先打電話Book定位穩陣。
兜口兜面拜太歲
來到蓬瀛仙館，當然要拜一拜呢度最出名嘅太歲，足足60個太歲像放在元辰殿之內，究竟拜邊個？唔使驚！蓬瀛仙館早有安排，仙館內有大幅圖表供善信查閱，只要參拜者Check清楚自己所屬太歲及參拜時辰，然後就可以重點出擊拜太歲，唔使下下聽風水師傅話你今年犯太歲，要佩戴咩嘢嚟化解咁麻煩，真係大大個太歲擺喺面前拜，希望今年萬事如意啦！
蓬瀛仙館蓬瀛齋廚（26693033）
地址：粉嶺百和路66號
營業時間：11:00am-5:30pm
泊車貼士：蓬瀛仙館不設車位，但館旁設有一個約可停20部車的咪錶停車場，$2/15分鐘。此外館旁的欣盛里也設有時租車場，約150個位，$5/1小時。
Point3
濕地公園親子遊
成個上晝同中午都喺煙霧彌漫嘅廟中度過，小朋友唔扭計就奇！不如去天水圍濕地公園吸吓新鮮空氣，又可以帶小朋友去上一課自然生態。從蓬瀛仙館出番粉嶺公路，向元朗方向一直駛至新田公路，再接青山公路、元朗公路，在天水圍出口轉入洪天路、天影路，再驅車5分鐘便到。
早前經常因限制入場人數而搞到大排長龍，採訪當下午去都仲有飛賣。來濕地公園真係可以玩足一日，因為公園佔地足有61公頃，分成多個展覽區，當中有觀鳥屋，泥灘及紅樹林等自然生態環境等，行一日肯定好過要小朋友在一堂自然課。
濕地公園都有禁忌
農曆新年期間，到濕地公園要留意一下衣着，因為好多人新年着衫例牌紅噹噹，但原來會對雀鳥構成刺激，麻煩除低你件火紅飲衫了！另外千祈唔好帶埋啲瓜子、開心果一類零食入場歎，因為四周真係好多雀會眼紅你！
香港濕地公園（27088885）
地址：天水圍濕地公園路
開放時間：10:00am-5:00pm
票價：成人$30，3歲至18歲小童/全日制學生/65歲以上長者$15，3歲以下免費
泊車貼士：公園內只有約40個車位，經常爆滿，$8/1小時。可停在濕地公園對面的俊宏軒等公共車場，收費由$8/1小時至$40/日泊
雙電趟門加大班椅
全家坐得冧
用Mazda8玩新春行大運，實在是最好不過，因為可以坐足8人之餘，中排的座椅更是有頭枕又有腳墊的大班椅，老人家一定讚佢坐得舒服！車內全WalkThrough設計亦令小朋友在停車後可在車廂內自由走動，猶如一個流動遊樂場。可遙控開關的雙電趟門亦令親戚朋友話咁易上、落車，就算自己無手開門，只需按一按遙控就OK！
行大運路程遙遠，以今日建議大家嘅路線，就差不多行勻半個新界，雖然很多路也屬高速公路，但Mazda8的巡航表現仍十分之好，懸掛表現恰到好處，營造出色的載客表現，從全車人士均在旅途中熟睡，便知Mazda8有多舒服！
引擎：2,260c.c.直4DOHC
馬力：163ps/6,500rpm
扭力：21.4kgm/4,000rpm
傳動：4前速自動波
車價：$249,900
車輛提供：萬事得汽車（28931112）
