新年有好多人到黃大仙祈福求籤，求完籤當然要解籤，左丁山經常識少少，扮代表，親友要解籤，一概來者不拒，但因親疏有別，其他人就請佢哋搵番「赤松黃仙祠」外面嘅專家去詮釋嘞。
黃大仙靈籤一百枝，每枝有古人故事，並非容易明白嘅，譬如第十三籤中平孟浩然尋梅，第十九籤中吉伏羲畫八卦，第五十五籤中平吳隱之投沉香……真係一時之間，會唔記得古人故事出於何典，故事嘅教訓係乜，於是解籤就容易出錯，你估會好似第四十三籤下下韓文公被貶，第二十七籤中平越王復國咁容易明白咩？
前輩舜哥好嘢噃，新年前送咗一本《韋基舜精解黃大仙百籤》（太平書局出版）畀左丁山，大概平時食飯之時，傾談中知道左丁山材料有限，驚左丁山在農曆年間，為親友解咗籤會睇錯隔籬，所以送書一本。唉吔，有此寶書在，解籤可以隨口噏，不亦樂乎！
舜哥生平愛讀書，精於體育，本身係雜學字典一類，同佢拗頸，要讀熟經書先至好。呢本《韋基舜精解黃大仙百籤》詳述每一位古人故事，精要不繁，可以當係古仔書睇，亦可作解籤參考，譬如求得第一籤上上龍虎渡姜公，籤云：「靈籤求得第一枝，龍虎風雲際會時，一旦凌霄揚自樂，任君來往赴瑤池。」唔好以為求得此籤便一定萬事大吉喎，舜哥話：「如果卜問自己可否經商，則殊非上籤，姜太公營商多次失敗，何來上上籤可言，如果謀職求前程，求籤者若是年輕人或中年人士，仍只平平而已……反而若是退休人士再獲僱用，求得此籤，才是上上。」點解呢，姜太公要到八十歲先至行運遇上文王，拜相封侯，要風得風，要雨得雨，真係上上到極！唔知道古人故事嘅來龍去脈，以為求得第一籤就開心到不得了，錯矣！試問啱啱大學畢業嘅學生問求職，求到黃大仙第一籤，你以為好過癮乎？等到八十歲先啦！有了舜哥此書，解黃大仙籤不求人，正！