送狗迎豬，新年過節，出現三宗交通事故，竟然非常詭異，都係同隧道有關！
首先就係九鐵大爆炸，導致六百乘客，黑洞逃亡，隧道扶老攜幼，摸黑逃生。跟住就係大欖隧道口，年三十嗰宗九巴片皮批頭車禍！
至於第三宗，就更加神奇，就係日光日白，紅磡海隧，忽然有一名鬼頭在隧道內徒步獨行，海底隧道通車以來，從未試過。
喺玄學上，隧道屬土，喺地底開鑿，命格上亦係屬陰，即是話命格屬土嘅，今年要小心。至於全港隧道，由大老山至到西隧，都應該擺放少少聖物，由八卦鏡、關帝神位到聖母像，地球一體化，中西無拘，總之要鎮一鎮佢至得！
隧道功能，在於「接駁」或「直通」，今年係凸首吮舉年，煲呔班子，經由前董餘孽三司十一局嘅叠羅漢式看守政府過渡，正想大展拳腳。現時三大隧道，連連出事，係咪象徵接駁不順、過渡不靈呢，咁就唔敢講！
呢嗱，好似當初呢頭入，明明標榜政治家，後來嗰頭出，就縮水為打工仔，呢條時光隧道，好似有魔術咁，令人擔憂。不過好彩，有個袋巾一齊競吮，袋巾生肖屬狗，有隻狗送上門，俾煲呔立斬於馬下，用狗血塗染門板，睇吓係咪逢凶化吉咧。