鄭中基(Ronald)首次自編、自導、自演嘅電影《心想事成》反應唔錯,令佢信心大增,為報答一班搏晒命嘅演員,Ronald日前自費喺銅鑼灣一酒家請谷德昭、楊愛瑾(Miki)、方力申(Alex)、閻清同張達明食飯,順便同佢哋開年,Ronald話:「其實屋企冇開年嘅習慣,不過一班演員咁幫手,咪順便同佢哋喺新年聚吓,派吓利是囉,最緊要大家開心。」
同為北方人嘅肥谷、閻清同Alex話過年通常包餃子應節,而Ronald點嘅菜除咗有魚、蝦同魚翅外,仲有意頭十足嘅當紅炸子雞,佢哋個個爭住食,其中以閻清最擦得。
爭搶達明利是
另外,成班演員只有達明結咗婚,順理成章成為各人討利是嘅對象,達明話每年利是支出全靠囝囝幫補,先可以收支平衡,佢話:「每年利是都派成4,000幾蚊,全靠囝囝嘅『收入』維持。」
場地提供:鳳城飲食集團銅鑼灣分店