「求籤不求人」，可以去坊間買本解籤書睇睇，自己解一番。不過，原來「求籤要求人」㗎，點解？新正頭，好多friend都會去睇風水、去廟求籤，其中阿四最誠心，年年都去黃大仙廟，今年我陪佢去。去到黃大仙廟，諗住求番支姻緣籤，隨手攞起個籤筒，就跪喺度求，點知阿四即刻叫住我，然後叫我Check吓個籤筒。我一睇，吓！點解有啲籤係重複嘅？仲要好多都係下下籤㖭，啋！大吉利是，咁咪增加咗我求到下下籤嘅機率？
阿四解釋，原來唔少人求籤之後，跌咗嘅籤唔執番，或者執錯隔籬嗰支，就咁放番入去，有啲仲搞笑，直頭攞埋支籤去搵人解㖭！阿四教我，其實可以問廟嘅工作人員，攞番個已經重新數過嘅籤筒。不過，最好都係自己數，籤筒齊晒一百支籤，冇多冇少至好用呀。
逢周一至周四刊出