爆機煲碟：全日發洩　<br>打機睇碟嗌餐飽

爆機煲碟：全日發洩　
打機睇碟嗌餐飽

農曆新年係大節日，好多人今日開始出街購物睇戲，人頭湧湧咁，加埋今日更係年初三「赤口」，不宜出門拜年，最佳節目首選梗係打機兼煲碟，若然你仲未為自己安排好娛樂時間表，今日就等我哋替你編排好一個打機同煲碟日程，日頭打機，夜晚煲碟，包你未試過新年過得咁熱鬧！

記者：許福合　
攝影：周旭文
Model：Mandy、Isis、Emily、鋒、Johnny

10:00am
《跑跑卡丁車》免費下載

一早起身，上網鬥番轉車，包你成個人精神晒，講嘅係最近好Hit嘅《跑跑卡丁車》，事關可以奉旨撞人，有咩唔如意都可以發洩晒，免得喺赤口出口傷人，不過如果你係新手，要喺遊戲內撞到人都唔係咁易，事關普遍來講，遊戲內玩家技術都好高，所以都係急Call幾個Friends，叫晒佢哋上網一齊鬥番轉會比較過癮。遊戲內可以自己設立私家房，專供自己友玩，當揀好角色，就可以開始第一場比賽喇！《跑跑卡丁車》玩法其實同任天堂台柱作品《孖寶賽車》有幾分相似，唔似得《GT》賣靚景，換來係趣怪角色同賽車，另外當然唔少得多種大整蠱道具，連NDS嗰招PowerSlide都有得出，不過要熟練自如咁使出來，指法一定要下苦功，唔係超唔到車，反而炒車收場！

●雖然畫面唔係高清靚景，不過賽車設計就夠晒趣怪。

●開始前可以選擇使用多個角色，各有唔同能力值。

●可以自己設私家房鬥車，唔怕被人放甩幾個圈。

●同《孖寶賽車》玩法相似，一樣可以喺路面抽道具。

炒到飛天

約齊幾個朋友開咗幾場競速賽，即係淨鬥快嘅賽事當作熱身之後，喺大家異口同聲之下，就轉玩道具賽，顧名思義，終於可以使用各種道具去整蠱對手，連帶車手們都變得認真，先出口認叻，為咗顧全面子，各人使出渾身解數。今日「車運」唔錯，經常抽到炸彈，呢個道具好處係威力驚人，可以炸到對手飛天，首名中招就係Johnny，佢由第一被炸到包艇尾，幾個女仔手車就一般，估唔到阿鋒原來訓練有素，跑咗幾圈都經常拎冠軍。最後一場，筆者立定決心，唔可以再俾阿鋒威晒，所有道具都以佢做目標，飛車撞人、放飛彈，喺佢車頭偷偷放蕉皮，好運拎到磁石就將佢吸落水，最後終於令到佢終點都過唔到，開心死！

主機：PC
開發：NEXON
種類：賽車
人數：多人
網址： http://tw.kartrider.gamania.com/

12:00pm
《熱舞Online》免費下載

香港有唔少《勁舞團》Fans，最近就有款《熱舞Online》推出，玩法就同《勁舞團》差唔多，都係因應音樂節拍，輸入唔同指令，同樣男男女女都咁啱玩，而且仲特別加入一啲有趣系統，每次玩完都會幫玩家計算消耗咗幾多卡路里，而角色就會出現肥或瘦變化，據講如果有一段時間無玩，即係無做運動，角色仲會變肥㖭，最啱食中午飯前，消耗一下脂肪！除咗單人模式，仲有團體對戰、情侶共舞等玩法，都有唔少變化。不過與《勁舞團》相比，可選歌曲未夠多，但肥瘦系統玩法又幾新鮮！