已故全國政協副主席霍英東嘅孫兒、立法會議員霍震霆嘅兒子霍啓山，04年同章子怡撻着，不過上月章子怡攬住紐約商界大亨ViviNevo睇波，霍啓山亦不愁寂寞，俾本報影到佢年初一約咗「少女章子怡」喺皇朝會撐枱腳開年。
「想𢭃多幾年利是先」
前晚霍啓山同大哥霍啓剛齊齊代表唔喺香港嘅老竇霍震霆，喺灣仔會展出席煙花大匯演酒會，提到章子怡有富貴男友，同樣已經另結新歡嘅霍啓山笑住口例牌話：「私人嘢我唔回應。我啱啱喺紐約返香港過年，我之前喺紐約工作咗一排，遲啲會去南沙幫屋企搞地產嘅嘢。」咁佢同章子怡分開，係咪因為兩個人分隔異地？霍啓山話：「唔可以咁講。」佢唔肯講仲有冇同章子怡聯絡，但就話自己𠵱家工作為上喎。大哥霍啓剛都口徑一致，問到佢幾時結婚派利是？霍啓剛笑住話：「我想𢭃多幾年利是先喎！」睇嚟郭晶晶想嫁入豪門做少奶奶，都仲要等多一輪囉！
