名模周汶錡去年身經百戰，與法籍男友Julien種出情花甜到漏，可是年底卻被蕭定一、吳文忻的「整容」罵戰圍攻，但她依然保住百毒不侵之身。周汶錡豬年犯太歲，早前她到圓玄學院還神祈福，品嚐齋菜，希望來年事業更上一層樓。
名模周汶錡（Kathy）狗年運程不錯，成功衝出模特兒界，殺入娛樂圈做旅遊美食主持、出書，感情路上也告明朗化，與法籍男友Julien戀情穩定。全年惟獨是非不斷，整容事件講足數年，至上月Kathy更因此與蕭定一、吳文忻掀罵戰。早前Kathy到荃灣圓玄學院還神，由於33歲、肖虎的她豬年犯「破太歲」，順道攝太歲。
還神順道祈福
Kathy先攝當年太歲（丁亥太歲），之後攝自己出生年的太歲，再逐一向其他太歲上香。Kathy說：「我嚟圓玄學院拜咗神好多年，都幾順利，立咗春咪順便攝埋太歲。」問她還得神落，可是感覺去年運程滿意？Kathy說：「舊年OK啦，100分滿分都有80分！我覺得一半係運，一半係自己努力，一個人唔可以永遠靠運氣。雖然工作量唔係最多，但係做得開心滿意。我堅持揀有信心做到嘅job先接，唔會亂接，例如叫我教煮食我係唔得，但係我鍾意食，做飲食主持就OK，揀啱工作好重要。」
問到整容傳言與罵戰方面？Kathy說：「講咗10年，我都唔會再擺喺心。」她又謂無懼豬年破太歲：「唔怕，人生總會有起跌，尤其做演藝人、模特兒，唔會永遠咁紅、咁順利，做好自己係最佳方法。」
推廣飲食文化
近年Kathy專攻飲食旅遊，變身香港旅遊大使，她日前帶同法國女性友人參觀廟宇及拜神，品嚐齋菜玉詔仙斑（芋頭魚）、桃源結義（素咕嚕肉）、鼎湖上素（羅漢齋）等。Kathy說：「我最鍾意食嘢，新年好多美食，又有得一家人拜年食飯，好開心，係我最鍾意嘅節日！」
採訪：DebbieLum 攝影：ChenWaiOn
