今日開工，個個都有個「初四面容」，即是公假放完，一早唔願起身都要起，返到公司仲要對住阿頭，唉……新一年第一日開工想開心啲，最佳嘅方法當然是食餐勁，食鮑魚自助餐就更加無得頂。美麗華酒店的全鮑自助餐，由頭盤到甜品，全部都用鮑魚做，包你食鮑飽。如果你個名有個朱字或者同音字，仲會有半價優惠㖭！
記者：梁學文 攝影：譚盈傑
Model：PC、Kinki
一個價錢食Buffet加火鍋
今次全鮑自助餐用了來自4個不同地方的鮑魚，包括南非、澳洲、大連和台灣。每款鮑魚味道和口感都唔同，今次可一次過食勻，一般頭盤冷菜有鮑魚唔出奇，不過食到甜品都有鮑魚就絕對少有。每兩個人去食仲有鮑魚龍蝦火鍋送，鮑魚、龍蝦、象拔蚌及瀨尿蝦等等，任攞任食，即是一個價錢，食勻自助餐同打邊爐。另外，只要個名有個朱字或者同音字，仲可以有半價，同枱的亦有八五折。可惜我不是姓朱，個名又無個朱字，都是搵個姓朱的朋友一齊去最着數。
貴價食材迎港人
美麗華酒店的燕窩Buffet一向都好受香港人歡迎，不過大廚黃耀根話新一年要搞搞新意思，配合香港人喜愛食豪啲，就推出全鮑自助餐：「香港人不嬲都鍾意食得豪，所以我哋就用多啲貴價嘅食材做菜，成本係高咗，不過可以迎合到香港人嘅口胃。」黃師傅入行20年，最拿手是炮製燕窩，對鮑魚菜亦有一定的認識，擅長中西合璧，創出新的Fusion菜，好像今次鮑魚自助餐的主菜雙蝦芋汁燴鮑魚，就是其中一個創新的做法，黃師傅用芋汁取代傳統的蠔汁，全新口味，又夠特別。
雙蝦芋汁燴鮑魚（每位一份）
用上澳洲鮑魚，再配上蝦餅和蝦子，一口咬落去就有3重口感。平時食鮑魚多數用蠔汁做，配芋頭汁都是頭一次。芋汁入口幼滑，仲有淡淡的椰香味，跟鮑魚又出奇地夾。蝦餅炸到脆卜卜，最好連鮑魚一齊放入口，一軟一硬好滋味。
煙熏三文魚卷配鮮鮑魚魚子醬
這個用南非鮑魚做的頭盤，海鮮味比較重。南非鮑魚先用上湯煮腍，然後用三文魚捲住，再加入蔬菜和黑魚子醬，入口有4種不同的感覺，先爽口後煙韌。黑魚子醬魚香味重，跟鮮味的南非鮑非常夾。
法式鮑魚龍蝦大燴
用4両的鮮龍蝦仔，跟台灣的九孔鮑一齊用龍蝦汁煮。台灣鮑魚本身味道唔太濃，用濃郁的龍蝦汁煮一煮，反而引出鮑魚的味道。龍蝦汁味道重是優點，亦是缺點，因為味重，好容易搶走其他配料的味道。
香草煙肉焗大連鮑魚
香草煙肉夠香口，加上有洋葱，味道夠鮮甜之餘，入口仲有爽口的感覺。鮑魚原隻入爐焗，保持了鮑魚的原汁原味。大連鮑魚足2両，肉質較厚，入口鮑魚味亦濃郁。
鮑魚皮蛋酥
平時食皮蛋酥就食得多，不過就未試過有鮑魚的皮蛋酥。皮蛋酥是甜點，加入鮑魚就有些少鹹，味道幾特別。鮑魚皮蛋酥外面鬆化，入面就煙韌軟滑。
4款不同的鮑魚
１大連鮑體積大而肉厚，鮑魚味濃。
２澳洲鮑的鮮味較重，肉質腍滑稍帶煙韌。
３台灣九孔鮑體積較細，味道較淡，最好就配點味濃的配料。
４南非鮑魚體積較大，鮑魚味道是4款鮑之冠。
睇路搵食
theatrium（23155199）
地址：尖沙嘴彌敦道118-130號美麗華酒店
全鮑自助晚餐收費：
成人$368/位
小童及老人家六折
時間：6:30pm-9:30pm 供應期：即日至3月31日
珠名朱姓優惠：凡於姓名內有朱或珠或同音字的，都可以有半價優惠，同行者可以有八五折，4位中最多1位可享半價，8位就可以有2位，餘此類推。入場時，記得Check清楚有無帶身份證呀！
