俗語有云，冇咁大個頭，唔好戴咁大頂帽。偏偏香港就係咁畸形，買一手新盤，揀特長成交期付款辦法，只係畀幾個巴仙樓價，就可做業主；買二手樓，肯畀按揭保險費，借九成半，同樣可以做業主。買樓入市表面上好易，但箇中風險好大，網友pigpig520比較理智，停一停、諗一諗，仲問埋各方意見㖭。
pigpig520話，自己同男友工作穩定，兩人共月入2萬2，想買個150萬元嘅單位，供30年，喺《香港討論區》提出：「如果無首期，你會買樓嗎？」
唔好講買定唔買住，mikasa第一時間提醒佢：「150萬元供30年，按九成半，另加5.97萬元保費落樓價。」直指保險費好貴。Illun坦言：「只有地產代理先會叫你買……風險太大。」
網友ssshiu就好鼓勵pigpig520，不過唔知佢係唔係做地產代理。「我會買，好多新盤畀5%首期咋，仲可以刷卡，用佢哋兩年免息免供，咪可以有樓住先，再喺兩年內分期還首期畀朋友或家人。」佢更補充，𠵱家唔買兩年後樓價升咗，150萬再買唔到現在心頭好，要揀次選。
其餘網友頭腦清晰，十居其九話唔好制。Victoriaahpak講：「如果無首期，即係話連救命錢都無，有乜依郁點算？」smugdull亦話：「無首期，利息支出好重，我唔制！」
pigpig520表示，「其實我男友打算將佢屋企層樓拎嚟按，再用嚟畀首期，因為佢屋企層樓一早供斷，𠵱家無負債。」
老土啲都要講句，買樓請三思，即使與男友感情深厚程度，將來唔好彩分手，間屋唔知點收科，其次男友屋企層樓拎出嚟按，自己是否有能力兩邊供？若然日後樓價跌，銀行加息，管理費等開支，負擔得來嗎？月月清袋咁吃力為乜呢？其實無首期，租樓不失為好辦法，儲多啲錢，或者等經濟能力改善之後，到時先諗買唔買樓都未遲，樓價係會升會跌嘅。