賭王何鴻燊同四姨太梁安琪前晚喺澳門新葡京酒店搞澳娛除夕晚宴，澳門特首何厚鏵畀面出席，賭王同特首一齊主持點睛儀式，現場有舞龍同燒炮仗助興，好有新年氣氛。
超雲豹紋裙省鏡
賭王魅力迫人，吸引大批途人圍觀之餘，有唔少遊客仲衝上前一睹賭王風采，好彩有大批保安維持秩序啫。
前晚三姨太陳婉珍未有蒲頭，只派大女超雲做代表，至於四姨太所生嘅超盈、猷君同猷亨就齊齊出席。超雲着豹紋低胸裙，超盈就以白色裙上陣，兩位何家淑女都打扮得好省鏡！儀式完咗之後，只見四姨太鬼鬼祟祟咁叫未夠秤、只得15歲嘅女超盈、同啱啱夠18歲嘅超雲入賭場。澳門規定未夠18歲係唔入得賭場，四姨太今次咁大膽喺新正頭觸犯法例，唔知喺咪愛女心切，想帶埋寶貝女入去新賭場見識吓呢？
