正所謂一年之計在於春，今日是大年初二，亦是開年的大日子，傳統上要開爐起鑊煮一餐。唔想開爐？無問題，都可以出街食個開年飯。既然潮流興玩傳統，不如就去食餐懷舊開年菜，韜韜更提醒大家：「記住食蘿蔔攞好意頭。」
記者：梁學文
攝影：伍慶泉
Model：Yoyo、Ruby、Hody、Kris、Lion
道具提供：屈臣氏
傳統圍村菜 食豬唔食牛
不知道傳統的圍村開年菜有甚麼特別呢？韜韜最拿手就是煮圍村菜，問他就最適合不過。韜韜話：「圍村人唔食牛，因為隻牛用嚟耕田，食咗搵邊個耕？仲有，就算隻牛老咗，都唔會捨得食，寧願賣咗佢，所以圍村菜就冇牛肉，開年多數食豬肉。」豬年食豬肉就應晒節，而且圍村菜同傳統廣東菜一樣要講意頭，一樣有蠔豉、豬脷等意頭材料。另外圍村菜一定有蘿蔔，韜韜話圍村人叫蘿蔔做菜頭，菜頭諧音「彩頭」，食完就好似攞過彩。
傳統習慣初二吃肉
以前的圍村人年三十就會先蒸糕點，初二開鑊就會做茶粿。初一只會食素，直至初二先吃肉，韜韜話：「因為未開爐，又唔殺生，所以以前初一只會食素，直到初一半夜，一踏入大年初二，就會放鞭炮起爐煮飯。好記得以前收爐之前仲會食餐飯，一定有碟雞，雞頭向住邊個，就係邊個食無情雞。初二開年嗰陣就會唔見咗人。」
百花彩頭 $10/隻（6隻起）
彩頭其實是白蘿蔔，中間的百花就是蝦膠。我專揀墜手的蘿蔔，實心又夠水，煮起來一定夠甜又多汁。蘿蔔入口多汁，而且好清甜。新年食蘿蔔（菜頭）攞彩頭，加上彈牙的蝦膠，好意頭又好味。
年年添大利 $48
豬脷用上湯煮，入味又腍滑，然後再加入蓮藕一齊用南乳燜，味道夠濃郁，當中的蓮藕爽、豬脷滑，一爽一滑的配搭，食到大家肥肥又白白。
家肥屋潤大富豪$10/隻（6隻起）
用臘肉蒸蠔，一上枱就有濃烈臘肉香，再夾雜蠔的甘香味，一啖咬落去，臘肉的肥油被蠔完全吸收，蠔中有肉香，又有軟滑口感。韜韜話以前會用金銀膶，不過太肥，現改用臘肉。最好一片臘肉一件蠔夾住食，滿口甘香。
生財大富豪 $48/6隻
韜韜專揀大蠔做炸蠔，一來口感好；二來蠔味夠，再加上脆漿炸，香口之餘又脆卜卜。吃的時候用生菜包住，清甜爽口，蘸些少淮鹽和喼汁食，味道更好。
生財就手
$48
講到圍村菜食豬，當然會有豬手，食豬手寓意橫財就手。豬手用南乳燜，入味又滑溜。
大榮華（24769888）
地址：元朗安寧路2-6號地下
蝦子柚皮 見證香港變遷
60年代開始，香港的經濟逐漸穩定，到了70年代開始起飛，去西苑食開年飯，就可以一次過體現香港的變遷。因為西苑的開年菜式由60年代開始，一路可以食到90年代，食出傳統滋味，張師傅話：「我哋啲菜可以話見證住香港嘅歷史變遷，由60年代嘅蝦子柚皮，到90年代帶西式風味嘅Fusion中菜都有得食，所以嚟食開年飯真係可以體現一次香港的演變。」
小時候每逢過節，祖母總會燜柚皮，很久沒吃過，在西苑竟然可以尋回這味道，勾起兒時回憶。燜柚皮功夫多，不是很多地方可以食到，張師傅話預備柚皮起碼要2日：「柚皮先用鹽洗，洗完要整亁，全個工序來回4次，真係幾煩。」難怪在屋企好難煮到，可以在開年的時候食得到，先對過去緬懷一番，再向前走都不錯。
福祿滿門 $138/份
福祿滿門其實是柚皮扣鵝掌，師傅選用泰國柚，皮和肉都較薄，不過柚味就夠重。預備好柚皮之後就可以加入大地魚、雞腳和火腿等材料一齊煲，煲6個鐘就食得。柚皮入口腍身，重柚味亦有火腿味，鵝掌就好鬆化。
仙鶴神針 $398/隻
70年代香港流行魚翅撈飯，食得耐都會悶，結果就有這道招牌菜。選用約1斤重的乳鴿，入面塞滿青片翅再去煲，魚翅吸收了乳鴿的味道，鴿肉亦嫩滑。青片翅翅針密，入口夠晒爽。
雪影杏汁包 $24/3隻
杏汁包混入西式的做法，外形似墨西哥包，入口就似菠蘿包。一上枱最好即放入口，熱辣辣最好味，不過小心燙口！
西苑（28822110）
地址：銅鑼灣恩平道28號利園2期101-102號
幾近失傳山瑞裙 豐富骨膠原
要數懷舊開年菜，又怎可缺少紫荊閣？大廚李師傅有超過30年煮粵菜經驗，18歲就入行，曾經在「國際大酒樓」和「統一酒樓」等傳統酒家做過，對傳統粵菜認識深，連幾近失傳的20年代菜式都識做，他說：「𠵱家無咩人會做傳統嘅菜，無咩人想學，真係無幾多處地方可以食番舊時嘅味道。好似山瑞裙，𠵱家好少人會煮，其實係好好味嘅菜，營養價值亦相當高。」山瑞裙是去紫荊閣必食的開年菜，好味又有益。另外，廣東菜就最愛改諧音名，取其好意頭，所以這裏的菜式好多都是玩諧音字，每道菜都好好意頭。
瑞氣呈祥 $168
要預備山瑞裙需時4日，所以很難會有酒樓做。山瑞裙亦夠矜貴，骨膠原夠多，營養價值豐富。山瑞裙用老雞火腿紅扣過，味道鮮，入口似海參，不過就較腍身。師傅話這道菜在清朝滿漢全席都有。
發財好事大利 $128（例牌）
新年必食蠔豉髮菜，取其諧音，食完會發財。選用足2吋長的金蠔，用糖和蠔油燜，師傅特別加入火腩，令蠔可以吸收多點油份，入口更甘香。
生財顯貴雞 $288
新鮮雞加蜆蚧，就是顯貴雞。這味50年代的顯貴雞，師傅先用生抽捽勻雞身，再用油炸，然後加入蜆蚧等調味一齊煮，做法不是太複雜，不過味道就好豐富，夠雞味之餘，亦有蜆蚧嘅海鮮味。
皺紗大元蹄 $238/1隻 $128/半隻
師傅用2斤半大元蹄，先起骨再油炸迫出豬油，造成皺紗效果，然後再用南乳燜3個鐘。這道菜在20年代廣州就有，一直流傳至今。元蹄入口有些少肥膩，南乳味好香口。
紫荊閣（26568222）
地址：九龍何文田窩打老道65A至65D地舖