美國石油公司純利不斷刷新紀錄，以埃克森美孚為例，去年就賺咗395億美元（約3081億港元），網友vermonthouse喺《MSNBC》直言難以置信：「我好想知道有幾多人因為買唔起貴油而捱凍囉！我哋政府唔知幾時先識得制止油商魚肉百姓？」
stopitalready亦覺得盈利多到離譜：「油公司又話煉油成本增加搞到佢哋無錢賺，結果盈利就年年創新高。我覺得有關方面應該作出監管，唔好再畀佢哋剝削啲升斗市民。」lel316仲話，油商賺咁多錢，好應該諗辦法還富於民。
油公司每分鐘賺7.5萬美金
不過，ZZZZs就回應話：「呢個係自由市場，我哋唔可以話企業牟利就一定唔啱，賺幾多先算係暴利亦都見仁見智。講真，油公司打開門做生意，就梗係為咗賺錢，我哋冇可能左右油組嘅決定，亦唔可以阻止呢類企業加價，唯一可以做嘅就係諗計阻止荷包出血。」Nicholas-R.附和，「油公司從來冇強迫任何人使用佢哋嘅產品，負擔唔起油價嘅車主可考慮改用單車代步，咁咪既可以做運動，又可以杯葛油企囉﹗」
撇除油公司係咪牟取暴利唔講，網友就計到一堆幾有趣嘅數字。greg12761話：「如果將395億美金嘅利潤，除以3億人嚟計，即係話油公司平均可以喺每個人身上獲利131.6美金。」bfegypt就話：「年賺395億美元，即係每小時賺450萬美元，或者係每分鐘賺7.5萬美元，真係和味﹗」
埃克森美孚利潤屢創新高，主要都係拜國際油價高漲所賜。去年夏季，國際原油價就曾一度升至每桶78美元嘅歷史高位。